നിലമ്പൂർ: കൂട്ടംതെറ്റി ഒറ്റപ്പെട്ട കാട്ടാനക്കുട്ടിയെ ആനക്കൂട്ടത്തോടൊപ്പം ചേർത്ത് നിലമ്പൂരിലെ വനം വകുപ്പ് ഉദ്യോഗസ്ഥർ. ലോക ആന ദിനത്തിൽ വനം മന്ത്രി എകെ ശശീന്ദ്രനാണ് ഫേസ്ബുക്ക് പോസ്റ്റിലൂടെ ഇക്കാര്യം പങ്കുവെച്ചത്. ലോക ഗജദിനത്തിൽ ഇത്തരമൊരു കാര്യം നിർവ്വഹിക്കാനായതിന്റെ ചാരിതാർത്ഥ്യത്തിലാണ് ഉദ്യോഗസ്ഥരെന്ന് മന്ത്രി പറഞ്ഞു.
കഴിഞ്ഞ ദിവസം രാവിലെ നെടുങ്കയം ഫോറസ്റ്റ് സ്റ്റേഷൻ പരിധിയിലെ ഐ.ബി കോമ്പൗണ്ടിൽ കണ്ടെത്തിയ മൂന്നുനാല് മാസം പ്രായമായ കാട്ടാനക്കുട്ടിയെ ആണ് ഉദ്യോഗസ്ഥർ കൂട്ടത്തിനൊപ്പം ചേർത്തത്. ഐ.ബി കോമ്പൗണ്ടിൽ നിന്നും കാനേകര ഭാഗത്തേക്ക് പോയ കാട്ടാനക്കുട്ടി രാത്രി 8.30 ഓടെ ചെറുപുഴ വളയംകുണ്ടിലെ സ്വകാര്യവ്യക്തിയുടെ സ്ഥലത്ത് എത്തിപ്പെട്ടു.
ഇവിടെ നിന്നും വനം വകുപ്പ് അധികൃതർ പിടികൂടി ചെറുപുഴ തേക്കുതോട്ടത്തിനു സമീപം കാട്ടാനക്കൂട്ടത്തോടൊപ്പം ചേരുന്നതിനായി ഇറക്കി വിട്ടെങ്കിലും വീണ്ടും കൂട്ടം തെറ്റി പിറ്റേദിവസം പുലർച്ചെ പടുക്ക ഫോറസ്റ്റ് സ്റ്റേഷൻ പരിധിയിലെ ജനവാസ മേഖലയിൽ എത്തി. വീണ്ടും പലതവണ കാട്ടിലേക്ക് കയറ്റി വിട്ടെങ്കിലും തിരികെ ഇറങ്ങുകയായിരുന്നു.
നിരന്തര പരിശ്രമങ്ങൾക്കൊടുവിൽ ഇന്ന് രാവിലെയോടെയാണ് കാട്ടാനക്കുട്ടിയെ ആനക്കൂട്ടത്തോടൊപ്പം ചേർക്കാനായതെന്ന് മന്ത്രി പറഞ്ഞു.
