റാഞ്ചി: സ്വാതന്ത്ര്യത്തിന്റെ 75-ാം വാർഷികത്തോടനുബന്ധിച്ച് ആസാദി കാ അമൃത് മഹോത്സവ് ആഘോഷിക്കുകയാണ് ഇന്ത്യ. എല്ലാ വീടുകളിലും പതാക ഉയർത്തണമെന്ന പ്രധാനമന്ത്രിയുടെ ആഹ്വാനവും ജനങ്ങൾ ഏറ്റെടുത്തു. ഇപ്പോഴിതാ ഏറ്റവും അധികം നീളമുള്ള ദേശീയ പതാക നിർമ്മിച്ച് ലോക റെക്കോർഡ് സൃഷ്ടിക്കാൻ ഒരുങ്ങുകയാണ് ഝാർഖണ്ഡ്.
ഝാർഖണ്ഡിലെ ബൊക്കാറോയിൽ മൂന്ന് കിലോമീറ്റർ നീളമുള്ള ദേശീയ പതാക നിർമ്മിക്കാനുള്ള പരിശ്രമങ്ങളാണ് പുരോഗമിക്കുന്നത്. ബൊക്കാറോയിലെ പിന്ദ്രജോറ ഗ്രാമത്തിൽ 3500 മീറ്റർ തുണി ഉപയോഗിച്ചാണ് ത്രിവർണ പതാകയുടെ നിർമാണം. ഇതിനായി രാവും പകലും നാല് കരകൗശല തൊഴിലാളികൾ പ്രവർത്തിക്കുന്നു. സാമൂഹിക പ്രവർത്തകനായ സഞ്ജീവ് കുമാറാണ് ഈ റെക്കോർഡ് ലക്ഷ്യത്തിനായി നേതൃത്വം നൽകുന്നത്.
ഓഗസ്റ്റ് 14ന് ബൊക്കാറോയിൽ നിന്ന് പതാകയാത്ര പുറപ്പെടും. ഏകദേശം 3.5 കിലോമീറ്റർ നീളമുള്ള ഈ ത്രിവർണ്ണ പതാക ഗിന്നസ് ബുക്കിൽ ഇടം പിടിക്കുമെന്നാണ് അധികൃതർ കരുതുന്നത്. നേരത്തെ 2500 മീറ്റർ നീളമുള്ള ദേശീയ പതാക ഈജിപ്തിൽ നിർമിക്കപ്പെട്ടിട്ടുണ്ട്. ഇപ്പോൾ 3500 മീറ്റർ നീളത്തിൽ നിർമിക്കുന്ന ഇന്ത്യയുടെ ത്രിവർണ പതാക റെക്കോർഡ് സൃഷ്ടിക്കുമെന്നും സഞ്ജീവ് കുമാർ പറയുന്നു.
