മുംബൈ: ടീം ഇന്ത്യയ്ക്ക് തലവേദനയാകുന്ന വിരാട് കോഹ് ലിയുടെ ഫോമില്ലായ്മയെക്കുറിച്ച് കൃത്യമായ നിരീക്ഷണവുമായി ആദ്യകാല പരിശീലകൻ. ഏഷ്യാകപ്പിന് മുന്നോടിയായി ലഭിക്കുന്ന വിശ്രമം താരത്തെ മികച്ച ഫോമിലേയ്ക്ക് തിരികെ എത്തിക്കുമെന്നും അദ്ദേഹം പറയുന്നു. ഇതിനിടെ വിരാട് കോഹ്ലി ഏഷ്യാകപ്പിൽ ഇന്ത്യയ്ക്ക് അഭിമാനമാകുന്ന പ്രകടനം നടത്തുമെന്ന പ്രത്യാശ വീണ്ടും സൗരവ് ഗാംഗുലിയും പങ്കുവെച്ചു.
‘കോഹ്ലി മഹാനായ താരം തന്നെയാണ്. എങ്ങനെയാണ് എത്ര ശക്തരായ ടീമിനെതിരേയും റൺസ് എടുക്കുക എന്ന് കോഹ്ലിയ്ക്കറിയാം. മധ്യനിരയിൽ ഇത്രയും ശക്തനായ ഒരു താരം ഇന്ത്യയ്ക്ക് ഉണ്ടായിട്ടില്ല. അതിവേഗം റൺസ് കയറ്റാനും വാലറ്റത്തിന്റെ സമ്മർദ്ദം കുറയ്ക്കാനും കോഹ്ലിക്ക് സാധിക്കും. എന്നാൽ സമീപകാലത്തെ ശ്രദ്ധക്കുറവ് അത് അപകടകരമായ രീതിയിൽ കോഹ്ലിയേയും ടീമിനേയും ബാധിച്ചു എന്നത് സത്യമാണ്.’ മുൻ പരിശീലകൻ രാജ്കുമാർ വ്യക്തമാക്കി.
‘കോഹ്ലി വിശ്രമിക്കട്ടെ. അതിനൊപ്പം പരിശീലനവും നന്നായി നടക്കുന്നുണ്ട്. മത്സരങ്ങൾ കളിക്കുമ്പോൾ ആ കരുത്ത് പുറത്തുവരും. ശക്തനായി കോഹ്ലി തിരികെ എത്തുമെന്നാണ് താൻ കരുതുന്നത്.’ സൗരവ് ഗാംഗുലി പറഞ്ഞു.
