കണ്ണൂർ: കണ്ണൂർ അന്താരാഷ്ട്ര വിമാനത്താവളത്തിൽ നിന്ന് പോലീസ് സ്വർണം പിടിച്ചെടുത്തു. 203 ഗ്രാം സ്വർണാഭരണമാണ് പോലീസ് കണ്ടെടുത്തത്. സംഭവത്തിൽ കാസർകോട് സ്വദേശി അസ്ലമിനെ പോലീസ് അറസ്റ്റ് ചെയ്തു. പിടികൂടിയ സ്വർണത്തിന് വിപണിയിൽ ഏകദേശം പത്ത് ലക്ഷം രൂപ വിലമതിക്കും.
മട്ടന്നൂർ എയർപോർട്ട് സിഐ കുട്ടികൃഷ്ണന്റെ നേതൃത്വത്തിലുള്ള അന്വേഷണ സംഘമാണ് പ്രതിയെ കുടുക്കിയത്. കസ്റ്റംസിന്റെ പരിശോധന കഴിഞ്ഞ് പുറത്തിറങ്ങിയ ആളായിരുന്നു അസ്ലം. സമാനരീതിയിൽ കഴിഞ്ഞ മാസവും പോലീസ് സ്വർണം പിടികൂടിയിരുന്നു. കസ്റ്റംസിന്റെ കണ്ണുവെട്ടിച്ച് മറികടന്ന് വന്നവർ നേരെ പോലീസിന്റെ വലയിലാകുകയായിരുന്നു.
ഇതിനിടെ കാസർകോട് 20 ലക്ഷം രൂപയുടെ കുഴൽപ്പണം പോലീസ് പിടികൂടി. സംഭവവുമായി ബന്ധപ്പെട്ട് രണ്ട് പേരെ പോലീസ് അറസ്റ്റ് ചെയ്തു. മംഗളൂരുവിൽ നിന്ന് പടന്നയിലേക്ക് കാറിൽ കടത്തുകയായിരുന്ന പണമാണ് പിടികൂടിയത്. അടുക്കത്ത് വയൽ സ്വദേശികളായ മെഹബൂബ്, മുഹമ്മദ് എന്നിവരാണ് അറസ്റ്റിലായത്.
