സുഹൃത്തുക്കൾക്കൊപ്പമുള്ള പാർട്ടി വീഡിയോ പുറത്ത് വന്നതിന് പിന്നാലെ മയക്കുമരുന്ന് പരിശോധന നടത്തി ഫിൻലൻഡ് പ്രധാനമന്ത്രി സന്ന മാരിൻ. പാർട്ടി വീഡിയോ വൈറലായതിന് പിന്നാലെ സന്ന മാരിൻ മയക്കുമരുന്ന് ഉപയോഗിച്ചിട്ടുണ്ടോ എന്നതിനുള്ള പരിശോധന നടത്തണമെന്ന് പ്രതിപക്ഷം ആവശ്യപ്പെട്ടിരുന്നു. ഇതിന് പിന്നാലെയാണ് ഇവർ പരിശോധന നടത്തിയത്.
നിയമവിരുദ്ധമായ മയക്കുമരുന്ന് താൻ ഒരിക്കലും ഉപയോഗിച്ചിട്ടില്ലെന്നും സന്ന മാരിൻ പറഞ്ഞു. ‘ ഞാൻ മയക്കുമരുന്ന് ഉപയോഗിച്ചിരുന്നോ എന്ന തരത്തിലുള്ള ഗുരുതരമായ ആരോപണങ്ങളാണ് എനിക്കെതിരെ ഉയർന്നു വന്നത്. ഈ ആരോപണങ്ങളെല്ലാം വളരെ ഗൗരവമുള്ളതായിരുന്നു. മയക്കുമരുന്ന് പരിശോധന ആവശ്യപ്പെട്ടത് അങ്ങേയറ്റം ബാലിശമായ കാര്യമായിരുന്നു. എന്നാൽ നിയമപരമായ സംരക്ഷണത്തിന് വേണ്ടി എനിക്കത് ചെയ്തേ മതിയാകൂ. അതുകൊണ്ട് തന്നെ പരിശോധന നടത്തി. അതിന്റെ ഫലം വളരെ കുറച്ച് ദിവസങ്ങൾക്കുള്ളിൽ കിട്ടും.
ഞാൻ ഒരിക്കലും മയക്കുമരുന്ന് ഉപയോഗിച്ചിട്ടില്ല. ആ പാർട്ടിയിൽ പങ്കെടുത്ത ഒരാൾ പോലും അത് ഉപയോഗിച്ചതായി കണ്ടതുമില്ല. എങ്കിലും പലരുടേയും സംശയം ഇല്ലാതാക്കാനും കൂടി വേണ്ടിയാണ് ഈ കാര്യത്തിന് മുതിർന്നതെന്നും’ സന്ന മാരിൻ പറഞ്ഞു. കഴിഞ്ഞ ദിവസമാണ് സന്ന മാരിൻ സുഹൃത്തുക്കളോടൊപ്പം പാർട്ടി നടത്തുന്നതിന്റെ വീഡിയോ പുറത്ത് വന്നത്. ഇതിൽ ഇവർ സുഹൃത്തുക്കളോടൊപ്പം നൃത്തം ചെയ്യുന്നതും പാട്ടു പാടുന്നതും കാണാം. ലോകത്തിലെ ഏറ്റവും പ്രായം കുറഞ്ഞ പ്രധാനമന്ത്രിയാണ് സന്ന മാരിൻ.
Comments