തിരുവനന്തപുരം: സംസ്ഥാനത്ത് ഓണക്കാലത്ത് കടുത്ത നിയന്ത്രണങ്ങളേർപ്പെടുത്തില്ലെന്ന് ആരോഗ്യവകുപ്പ്. കൊറോണ വ്യാപനം നിയന്ത്രണ വിധേയമായെന്നാണ് ആരോഗ്യ വകുപ്പ് വിളിച്ചു ചേർത്ത യോഗത്തിലെ വിലയിരുത്തൽ. ആഘോഷങ്ങളിൽ മാസ്ക് ഉപയോഗം നിർബന്ധമാക്കണമെന്നും ജാഗ്രത പാലിക്കണമെന്നും മുന്നറിയിപ്പുണ്ട്.
കൊറോണ വ്യാപനം നിയന്ത്രണ വിധേയമെന്ന വിലയിരുത്തിയതിനാൽ മുൻ വർഷങ്ങളിലേതുപോലെ ഇത്തവണ ഓണാഘോഷങ്ങൾക്ക് നിയന്ത്രണമേർപ്പെടുത്തില്ല. സംസ്ഥാന സർക്കാരിന്റെ ഓണം വാരാഘോഷം ഉൾപ്പടെ വിപുലമായി സംഘടിപ്പിക്കാനാണ് തീരുമാനം.
എന്നാൽ രോഗ ലക്ഷണങ്ങമുള്ളവർ ആഘോഷങ്ങളിൽ നിന്ന് വിട്ട് നിൽക്കണം. വ്യാപാര സ്ഥാപനങ്ങളിലും ഇതേ മാനദണ്ഡങ്ങൾ പാലിക്കണമെന്നാണ് ആരോഗ്യവകുപ്പിന്റെ നിർദേശം. പൂർണമായും ജാഗ്രത വെടിഞ്ഞാൽ ഓണം കഴിയുമ്പോൾ രോഗബാധിതതരുടെ എണ്ണം കുത്തനെ ഉയർന്നേക്കുമോയെന്ന ആശങ്കയും ആരോഗ്യ വകുപ്പിനുണ്ട്.
ഓണം വാരാഘോഷം ഏത് രീതിയിലാകണമെന്നത് സംബന്ധിച്ച് വിവിധ വകുപ്പുകളുമായി ചേർന്ന് കൂടിയാലോചന നടത്താനും യോഗത്തിൽ തീരുമാനമായി. മാസ്ക് ഉപയോഗം നിരീക്ഷിക്കുന്നതിനായി പോലീസുകാരെ ചുമതലപ്പെടുത്തുമെന്നാണ് ആരോഗ്യവകുപ്പ് അറിയിക്കുന്നത്.
