ഉഡുപ്പി: കോൺഗ്രസ് ഓഫീസിൽ വീര സവർക്കറുടെ പോസ്റ്റർ. ഉഡുപ്പി വിജയപുരയിലെ കോൺഗ്രസ് ഓഫീസിലാണ് പോസ്റ്റർ പതിച്ചത്. രാവിലെ നേതാക്കളെത്തിയതോടെ പോലീസിനെ വിളിച്ച് പോസ്റ്റർ നീക്കി. സ്ഥലത്ത് സംഘർഷ സാദ്ധ്യത കണക്കിലെടുത്ത് പോലീസ് സുരക്ഷയും വർദ്ധിപ്പിച്ചിട്ടുണ്ട്.
കഴിഞ്ഞ ദിവസം കുടകിൽ കോൺഗ്രസ് നേതാവ് സിദ്ധരാമയ്യയെ ബിജെപി പ്രവർത്തകർ കരിങ്കൊടി കാണിച്ചിരുന്നു. ഇതിനെതിരെ ഹൂബളളിയിൽ നടന്ന കോൺഗ്രസ് പ്രതിഷേധത്തിനിടെ കോൺഗ്രസ് പ്രവർത്തകർ സവർക്കറുടെ ചിത്രം കത്തിച്ചിരുന്നു. ഇതിന്റെ വീഡിയോ പുറത്തുവന്നതും സമൂഹമാദ്ധ്യമങ്ങളിൽ പ്രതിഷേധവും ഉയർന്നിരുന്നു. ഇതിന് മറുപടിയായിട്ടാണ് കോൺഗ്രസ് ഓഫീസിൽ പോസ്റ്റർ പതിച്ചതെന്നാണ് സൂചന.
പോസ്റ്റർ കണ്ടതോടെ ഉഡുപ്പി പോലീസിനെ വിളിച്ച് അത് നീക്കം ചെയ്യാൻ കോൺഗ്രസ് നേതാക്കൾ ആവശ്യപ്പെടുകയായിരുന്നു. തുടർന്നാണ് സംഘർഷം ഒഴിവാക്കാൻ പോലീസ് സുരക്ഷ ഉയർത്തിയത്.
കഴിഞ്ഞ ദിവസം ശിവമോഗയിൽ സവർക്കറുടെ ബാനർ ഉയർത്തുന്നതുമായി ബന്ധപ്പെട്ട് സംഘർഷമുണ്ടായിരുന്നു. ഇതിന് പിന്നാലെ മുസ്ലീം ഭൂരിപക്ഷ മേഖലയിൽ മാത്രം സവർക്കറുടെ ചിത്രം എന്തിനാണ് ബിജെപി ഉയർത്താൻ ശ്രമിക്കുന്നതെന്നും ടിപ്പുവിന്റെ ചിത്രം എന്തിനാണ് നീക്കം ചെയ്യുന്നതെന്നും സിദ്ധരാമയ്യ ചോദിച്ചിരുന്നു. ഇതിൽ പ്രതിഷേധിച്ചാണ് ബിജെപി പ്രവർത്തകർ കരിങ്കൊടി കാട്ടിയത്.
