ന്യൂഡൽഹി: മുതിർന്ന നേതാവ് ഗുലാം നബി ആസാദിന്റെ രാജിയോടെ കോൺഗ്രസിന്റെ അന്ത്യം ആരംഭിച്ചതായി കോൺഗ്രസ് വിട്ട് ബിജെപിയിൽ ചേർന്ന സുനിൽ ജഖാർ. ഗുലാംനബി ആസാദിന്റെ രാജിയ്‌ക്ക് പിന്നാലെ മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം . നിലവിൽ കോൺഗ്രസിനെ നയിക്കുന്ന ഒരു കൂട്ടം സ്തുതിപാഠകരാണെന്നും അദ്ദേഹം വിമർശിച്ചു. കഴിഞ്ഞ മെയിലാണ് നേതൃത്വവുമായുള്ള അസ്വാരസ്യങ്ങളെ തുടർന്ന് സുനിൽ ജഖാർ പാർട്ടി വിട്ട് ബിജെപിയിൽ ചേർന്നത്.
കോൺഗ്രസിനെ നയിക്കുന്നത് സ്തുതി പാഠകർ ആയതുകൊണ്ടാണ് ഗുലാം നബി ആസാദ് പാർട്ടി വിട്ടത്. സങ്കുചിത മനസ്ഥിതിക്കാർ പാർട്ടിയുടെ നേതൃത്വത്തിലേക്ക് എത്തും. ന്യൂനതകൾ എന്തെന്ന് തിരിച്ചറിയാനോ, അത് പരിഹരിക്കാനോ കോൺഗ്രസ് തയ്യാറാകുന്നില്ല. ചീട്ടുകൊട്ടാരം പോലെ കോൺഗ്രസ് പാർട്ടി തകർന്നടിയുമെന്നും ജഖാർ പറഞ്ഞു.
കോൺഗ്രസിന് അതിന്റേതായ ലക്ഷ്യങ്ങൾ ഉണ്ടായിരുന്നു. എന്നാൽ ഇത് തിരിച്ചറിയുന്നതിൽ ഹൈക്കമാൻഡ് പരാജയപ്പെട്ടു. കോൺഗ്രസ് വിടുമ്പോൾ താൻ പറഞ്ഞ കാര്യങ്ങൾ ഒക്കെ സത്യമാണെന്ന് ഇപ്പോൾ തെളിയുകയാണ്. കഴിവുള്ളവരെ മനസ്സിലാക്കുന്നതിൽ കോൺഗ്രസ് സമ്പൂർണ പരാജയമാണ്. ഒരിക്കലും പാർട്ടി അഭിമുഖീകരിക്കുന്ന പ്രശ്‌നങ്ങൾ പരിഹരിക്കാൻ കോൺഗ്രസ് ശ്രമിച്ചിട്ടില്ലെന്നും അദ്ദേഹം കുറ്റപ്പെടുത്തി.
Comments