പനാജി: ബിജെപി നേതാവ് സൊനാലി ഫോഗട്ടിന്റെ മരണവുമായി ബന്ധപ്പെട്ട കേസില് രണ്ട് പേര് കൂടി അറസ്റ്റിലായി. സൊനാലി മരിക്കുന്നതിന്റെ തലേന്ന് രാത്രി പാര്ട്ടിയില് പങ്കെടുത്ത റെസ്റ്റോറന്റിന്റെ ഉടമ, ലഹരിമരുന്ന് കച്ചവടക്കാരന് എന്നിവരാണ് അറസ്റ്റിലായത്. നേരത്തെ സൊനാലിയുടെ സഹായികളായ സുധീര് സാഗ്വന്, സുഖ്വിന്ദര് വസി എന്നിവരെ അറസ്റ്റ് ചെയ്തിരുന്നു. സൊനാലിയുടെ സഹായികള് ഇവരെ നിര്ബന്ധിച്ച് ലഹരി കഴിപ്പിച്ചതായി പോലീസിന് വിവരം ലഭിച്ചിരുന്നു.
സിനിമാ ചിത്രീകരണത്തിനാണ് സൊനാലി ഹരിയാനയില് നിന്ന് ഗോവയിലേക്ക് എത്തിയത്. ഓഗസ്റ്റ് 23ന് പുലര്ച്ചെയാണ് ഇവരെ മരിച്ച നിലയില് കണ്ടെത്തിയത്. ഹൃദയാഘാതമാണെന്നായിരുന്നു പ്രാഥമിക നിഗമനം. എന്നാല് പോസ്റ്റ്മോര്ട്ടത്തില് മൃതദേഹത്തില് ആയുധം ഉപയോഗിച്ചുള്ള പരിക്കുകള് കണ്ടെത്തി. സഹോദരനായ റിങ്കു ധാക്കയും സംഭവത്തില് വിശദമായ അന്വേഷണം ആവശ്യപ്പെട്ട് രംഗത്തെത്തിയിരുന്നു.
റെസ്റ്റോറന്റില് നടന്ന പാര്ട്ടിക്കിടെ സൊനാലിയുടെ സഹായികളായ സുധീര് സാഗ്വനും സുഖ്വീന്ദര് വസിയും സൊനാലിയെ നിര്ബന്ധിച്ച് ലഹരി കലര്ന്ന ദ്രാവകം കുടിപ്പിച്ചതായി പോലീസ് കണ്ടെത്തിയിരുന്നു. ഇതിന് തെളിവായി സിസിടിവി ദൃശ്യങ്ങള് പോലീസ് ശേഖരിക്കുകയും ചെയ്തിരുന്നു. അബോധാവസ്ഥയിലായ സൊനാലിയെ പ്രതികള് കൊണ്ടുപോകുന്നതിന്റെ ദൃശ്യങ്ങളും പുറത്ത് വന്നിട്ടുണ്ട്.
