ഹൈദരാബാദ് : ഗുലാം നബി ആസാദിന് പിന്നാലെ ഒരു മുതിർന്ന നേതാവ് കൂടി കോൺഗ്രസ് വിട്ടു. തെലങ്കാനയിലെ എംഎൽഎയും മുതിർന്ന പാർട്ടി നേതാവുമായ എംഎ ഖാനാണ് രാജിവെച്ചത്. രാഹുൽ ഗാന്ധി വൻ പരാജയമാണെന്ന് കുറ്റപ്പെടുത്തിക്കൊണ്ടായിരുന്നു നേതാവിന്റെ രാജി.
തന്റെ അര നൂറ്റാണ്ട് കാലത്തെ പാർട്ടി പ്രവർത്തനം നിർത്തുന്നുവെന്ന് അഞ്ച് പേജുള്ള രാജിക്കത്തിൽ അദ്ദേഹം വിവരിച്ചു. രാഹുൽ ഗാന്ധിക്ക് മുതിർന്നവരോട് പെരുമാറാൻ അറിയില്ല. രാഹുലിനെ പാർട്ടിയുടെ വൈസ് പ്രസിഡന്റ് ആക്കിയതോടെയാണ് കോൺഗ്രസ് ഇല്ലാതാകാൻ തുടങ്ങിയത്. രാഹുൽ വൻ പരാജയമാണ്. അയാൾക്ക് അയാളുടേതായ ചില ധാരണകളുണ്ട്. അത് മറ്റാരുമായും പൊരുത്തപ്പെട്ടു പോകില്ലെന്നും എംഎ ഖാൻ കുറ്റപ്പെടുത്തി.
പാർട്ടിയെ ശക്തിപ്പെടുത്താൻ വർഷങ്ങൾ നീണ്ട പോരാട്ടം നടത്തിയ മുതിർന്ന നേതാക്കൾ പോലും ഇപ്പോൾ പാർട്ടി വിടുന്ന അവസ്ഥയാണ്. പാർട്ടിക്കുള്ളിൽ തന്നെ നിരവധി ഗ്രൂപ്പുകളാണ് ഇപ്പോൾ പ്രവർത്തിക്കുന്നത്. ഈ സാഹചര്യത്തിൽ പാർട്ടി പരിപാടികളിൽ പങ്കെടുക്കാതിരിക്കുക എന്ന വഴി മാത്രമേ തനിക്ക് മുന്നിൽ ഉണ്ടായിരുന്നുള്ളൂ എന്നും അദ്ദേഹം പറഞ്ഞു.
