ഡ്യുറൻഡ്സ് കപ്പ് മത്സരത്തിൽ ഈസ്റ്റ് ബംഗാളിനെ എതിരില്ലാത്ത ഒരു ഗോളിന് (1-0) പരാജയപ്പെടുത്തി എ ടി കെ മോഹൻ ബഗാൻ. കൊൽക്കത്തയിലെ സാൾട്ട് ലേക്ക് സ്റ്റേഡിയത്തിൽ നിറഞ്ഞു കവിഞ്ഞ ആരാധകർക്ക് മുന്നിൽ തീ പാറുന്ന പോരാട്ടമാണ് നടന്നത്.
കളിയുടെ ആദ്യ പകുതിയിൽ കയറിയ സെൽഫ് ഗോളിൽ ഡ്യൂറൻസ് കപ്പിലെ ആദ്യ വിജയം എ ടി കെ മോഹൻ ബഗാന് സ്വന്തം.
ഇരു ടീമുകളും ഒന്നിനൊന്ന് മെച്ചപ്പെട്ട കളി കാഴ്ച വെച്ചപ്പോൾ സാൾട്ട് ലേക്ക് സ്റ്റേഡിയം ആവേശ തിരയിളക്കം സൃഷ്ടിക്കുകയായിരുന്നു. ഈസ്റ്റ് ബംഗാൾ ശക്തമായ പ്രതിരോധ നിരകളാൽ ടീമിനെ ശക്തിപ്പെടുത്താൻ ശ്രമിച്ചെങ്കിലും അപ്രതീക്ഷിതമായി കയറിയ സെല്ഫ് ഗോളിൽ ഈസ്റ്റ് ബംഗാൾ തകർന്നടിയുകയായിരുന്നു.
ശക്തമായ പാസിലൂടെ ഗോൾപോസ്റ്റിലേക്ക് നിറയൊഴിക്കാൻ ശ്രമിച്ച പല ശ്രമങ്ങളും ഈസ്റ്റ് ബംഗാൾ കീപ്പർ തടുത്തു മാറ്റുകയായിരുന്നു. 42 മിനിട്ടു കഴിഞ്ഞു നൽകിയ എക്സ്ട്രാ ടൈമിലെ രണ്ടാം മിനിറ്റിൽ കയറിയ സെല്ഫ് ഗോൾ മോഹൻ ബഗാന് കൂടുതൽ കരുത്ത് പകരുകയായിരുന്നു. രണ്ടാം പകുതിയിൽ ശക്തമായി തിരിച്ചു വന്ന ഈസ്റ്റ് ബംഗാൾ കളിക്കളത്തിൽ നിറഞ്ഞാടുകയായിരുന്നു.
53മത്തെ മിനിറ്റിൽ ഇവാൻ ഗോൺസലിന്റെ കാലിൽ നിന്നും തെറിച്ചു വീണ പന്തിനെ ആഷിക് കാരുണിയാൻ എടുക്കുകയും ഗോൾ പോസ്റ്റിലേക്ക് മികച്ച ഒരു ഷോട്ട് അടിക്കുകയും ചെയ്‌തെങ്കിലും കീപ്പർ കമൽജിത് സിംഗ് തടുത്തു. ഈ അവസരം നഷ്ടപ്പെട്ടതോടെ ഈസ്റ്റ് ബംഗാൾ ആകെ പ്രതിരോധത്തിലാവുകയായിരുന്നു. തുടർന്ന് നടന്ന വാശിയേറിയ പോരാട്ടത്തിൽ ഈസ്റ്റ് ബംഗാളിനെ നിലം തൊടാൻ സമ്മതിക്കാതെ മോഹൻ ബഗാൻ മുന്നേറുകയായിരുന്നു.
