ഇന്ത്യാനാപോളിസ്: അമേരിക്കയിലെ അക്രമസംഭവങ്ങളിൽ വിദേശ സൈനികന് ദാരുണാന്ത്യം. വിദഗ്ധ പരിശീലനത്തിനായി എത്തിയ ഡച്ച് സൈനികനാണ് അക്രമിയുടെ വെടിയേറ്റ് വീണത്. ഇന്ത്യാനാപോളിസിൽ ഒരു ഹോട്ടൽ പരിസരത്തുണ്ടായ വെടിവെപ്പിലാണ് ഡച്ച് സൈനികന് വെടിയേറ്റത്. കൂടെയുണ്ടായിരുന്ന രണ്ട് പേർക്കും വെടിയേറ്റതായി ഇന്ത്യാനാപോളിസ് പോലീസ് വിഭാഗം അറിയിച്ചു.
അമേരിക്കയിൽ പരിശീലനത്തിനായി എത്തിയഡച്ച് സൈനികർ സംഭവം നടക്കുമ്പോൾ നഗരത്തിൽ കാഴ്ചകൾ കാണാനായി ഇറങ്ങിയതായിരുന്നുവെന്ന് ഡച്ച് പ്രതിരോധ മന്ത്രാലയം അറിയിച്ചു. വെടിയേറ്റ മറ്റ് രണ്ട് സൈനികർ ആശുപത്രിയിലാണെന്നും അപകടനില തരണം ചെയ്തെന്നും പോലീസ് അറിയിച്ചു.
ഏതാനും ദിവസങ്ങളായി ഇന്ത്യാനാപോളിസ് മേഖലയിൽ അക്രമസംഭവങ്ങൾ തുടരുകയാണ്. ഇതിനിടെയാണ് ഡച്ച് സൈനികർക്ക് വെടിയേറ്റത്. അക്രമികളെ ഇതുവരെ അറസ്റ്റ് ചെയ്തിട്ടില്ല. തികച്ചും ഏകപക്ഷീയവും ഒറ്റപ്പെട്ടതുമായ അക്രമവുമാണ് നടന്നതെന്നാണ് പോലീസ് പറയുന്നത്. കഴിഞ്ഞ രണ്ടു വർഷത്തിനിടെ 100 ലേറെ വെടിവെപ്പുകളാണ് അമേരിക്കയെ ഭീതിയിലാഴ്ത്തുന്നത്. സ്കൂളുകളിലും പൊതുനിരത്തുകളിലും മാളുകളി ലുമായി നിരവധി നിരപരാധികളാണ് അക്രമികളുടെ വെടിയേറ്റ് വീണത്.
