ന്യൂഡൽഹി : ഡൽഹി ഉപമുഖ്യമന്ത്രി മനീഷ് സിസോദിയയ്ക്ക് കുരുക്ക് മുറുകുന്നു. മദ്യ കുംഭകോണക്കേസുമായി ബന്ധപ്പെട്ട അന്വേഷണത്തിന്റെ ഭാഗമായി സിബിഐ സിസോദിയയുടെ ബാങ്ക് ലോക്കർ തുറന്ന് പരിശോധന ആരംഭിച്ചു. പഞ്ചാബ് നാഷണൽ ബാങ്കിന്റെ ഗാസിയാബാദ് ബ്രാഞ്ചിലുള്ള ലോക്കറാണ് തുറന്നത്. ഭാര്യയ്ക്കൊപ്പമാണ് സിസോദിയ ബാങ്കിലെത്തിയത്.
മദ്യ കുംഭകോണക്കേസുമായി ബന്ധപ്പെട്ട് കള്ളപ്പണ ഇടപാടുകൾ നടന്നിട്ടുള്ളതായി സിബിഐ സംശയിക്കുന്നു. ഈ സാഹചര്യത്തിലാണ് അന്വേഷണം ശക്തമാക്കുന്നത്.രണ്ടാഴ്ച മുൻപ് സിസോദിയയുടെ വീട്ടിൽ അന്വേഷണ ഉദ്യോഗസ്ഥർ റെയ്ഡ് നടത്തിയിരുന്നു.
അന്ന് വീട്ടിൽ നിന്നും ഉദ്യോഗസ്ഥർക്ക് ഒരു തെളിവും ലഭിച്ചില്ലെന്നാണ് സിസോദിയയുടെ അവകാശവാദം. തന്റെ ബാങ്ക് ലോക്കറിൽ നിന്നും ഒന്നും ലഭിക്കില്ലെന്നും ഡൽഹി ഉപമുഖ്യമന്ത്രി അവകാശപ്പെട്ടു. മദ്യ കുംഭകോണക്കേസിൽ സിബിഐ ഫയൽ ചെയ്ത എഫ്ഐആറിൽ പ്രധാനപ്രതിയാണ് സിസോദിയ.
