ഷില്ലോങ് : മേഘാലയയിൽ പോലീസ് നിരീക്ഷണം ശക്തമാക്കിയതായി ഡിജിപി. പ്രദേശത്ത് ജിഹാദി പ്രസ്ഥാനങ്ങളുടെ സാന്നിദ്ധ്യം നിലനിൽക്കുന്ന സാഹചര്യത്തിലാണ് നിരീക്ഷണം ശക്തമാക്കിയത്. ബംഗ്ലാദേശ് അതിർത്തിക്ക് സമീപമുള്ള പ്രദേശങ്ങളിൽ ജാഗ്രത പുലർത്തുന്നുണ്ടെന്നും ഡിജിപി എൽആർ ബിഷ്നോയ് പറഞ്ഞു. സംസ്ഥാനത്ത് നടന്ന ഒരു പരിപാടിയിലാണ് ജിഹാദി പ്രസ്ഥാനങ്ങളുമായി ബന്ധപ്പെട്ട വിവരങ്ങൾ അദ്ദേഹം പുറത്ത് വിട്ടത്.
അതിർത്തികൾ ലക്ഷ്യമാക്കി ജിഹാദികൾ നീക്കങ്ങൾ നടത്തുന്നുണ്ടെന്ന് വിവരം ലഭിച്ചിട്ടുണ്ട്. ഈ സാഹചര്യത്തിലാണ് പ്രദേശത്ത് അതീവ ജാഗ്രതയും നിരീക്ഷണവും ശക്തമാക്കിയതെന്ന് ഡിജിപി വ്യക്തമാക്കി. ബംഗ്ലാദേശ് അതിർത്തിയിലെ ചില പ്രധാന പ്രദേശങ്ങളിൽ അവരുടെ സാന്നിദ്ധ്യം വ്യക്തമായിട്ടുണ്ടെന്നും അദ്ദേഹം കൂട്ടിച്ചേർത്തു.
കൂടാതെ ഇന്ത്യയുടെ സ്വാതന്ത്ര്യത്തിന്റെ 75-ാം വാർഷികത്തോടനുബന്ധിച്ച് ഷില്ലോങ്ങിൽ നിന്ന് ഡൽഹിയിലേക്കുള്ള ബിഎസ്എഫിന്റെ മോട്ടോർ സൈക്കിൾ റാലി ബിഷ്ണോയ് ഫ്ലാഗ് ഓഫ് ചെയ്തു.മേഘാലയ, അസം, പശ്ചിമ ബംഗാൾ, ബിഹാർ, ജാർഖണ്ഡ്, യുപി, ഡൽഹി എന്നീ ഏഴ് സംസ്ഥാനങ്ങൾ റാലി ഇതിനോടകം പിന്നിട്ടു. സെപ്റ്റംബർ 16നാണ് റാലി സമാപിക്കുന്നത്.
