മുംബൈ : വാക്സിൻ നിർമ്മാതാക്കളായ സിറം ഇൻസ്റ്റിറ്റ്യൂട്ട് ഓഫ് ഇന്ത്യയിൽ തട്ടിപ്പ്. കമ്പനി സിഇഒ അദാർ പൂനാവാലയുടെ പേരിൽ ഒരു കോടി രൂപയാണ് തട്ടിയത്. വാട്സ് ആപ്പ് സന്ദേശത്തിലൂടെ തട്ടിപ്പുകാർ പണം ആവശ്യപ്പെടുകയായിരുന്നു എന്നാണ് വിവരം. സംഭവത്തിൽ പോലീസ് എഫ്ഐആർ രജിസ്റ്റർ ചെയ്തു.
കമ്പനി ഡയറക്ടർ സതീഷ് ദേശ്പാണ്ഡെയ്ക്കാണ് വാട്സ്ആപ്പ് സന്ദേശം ലഭിച്ചത്. ബാങ്ക് അക്കൗണ്ട് വിശദാംശങ്ങളും ഇതോടൊപ്പം ഉണ്ടായിരുന്നു. പൂനാവാലയെന്ന് കരുതി ദേശ്പാണ്ഡെ ഉടൻ പണം അയയ്ക്കാൻ നിർദ്ദേശിച്ചുകൊണ്ട് ഫിനാൻസ് വിഭാഗത്തിന് സന്ദേശം ട്രാൻസ്ഫർ ചെയ്തു. 1,01,01,554 രൂപയാണ് ഇതനുസരിച്ച് കൈമാറിയത്.
എന്നാൽ പിന്നീടാണ് സന്ദേശമയച്ചത് പൂനാവാലയല്ലെന്ന് മനസിലായത്. ഇതോടെ പോലീസിൽ പരാതി നൽകി. സംഭവത്തിൽ അന്വേഷണം പുരോഗമിക്കുകയാണ്. കൊറോണയ്ക്കെതിരായ കൊവിഷീൽഡ് അടക്കമുള്ള വാക്സിനുകളുടെ ഇന്ത്യയിലെ നിർമ്മാതാക്കളാണ് സിറം ഇൻസ്റ്റിറ്റ്യൂട്ട്.
Comments