പാഞ്ഞടുത്ത കൊമ്പന്റെ മുന്നിൽ കൂളായി വാഹനം ഓടിക്കുന്ന വീഡിയോ സമൂഹമാദ്ധ്യമങ്ങളിൽ വൈറലായിരിക്കുകയാണ്. കാട്ടാന ആക്രമിക്കാൻവേണ്ടി ഓടിയടുക്കുന്നത് കണ്ട വാഹനത്തിന്റെ ഡ്രൈവർ ഒരു നിമിഷം പോലും ചിന്തിക്കാതെ വാഹനം പിറകോട്ടെടുക്കുകയും വാഹനത്തിലുണ്ടായിരുന്നവരുടെ ജീവൻ രക്ഷിക്കുകയും ചെയ്തു. ഈ വീഡിയോ പങ്കുവെച്ചുകൊണ്ട് ഡ്രൈവറെ പ്രകീർത്തിക്കുകയാണ് പ്രമുഖ വ്യവസായി ആനന്ദ് മഹീന്ദ്ര.
ലോകത്തിലെ ഏറ്റവും മികച്ച ബൊലേറോ ഡ്രൈവർ എന്നാണ് ഈ വീഡിയോയിൽ വാഹനമോടിച്ചയാളെ ആനന്ദ് മഹീന്ദ്ര വിളിച്ചത്. കഴിഞ്ഞ വ്യാഴാഴ്ച കബനി ഫോറസ്റ്റ് റിസർവിൽ നടന്ന സംഭവമാണിത്. വാഹനമോടിക്കുന്ന വ്യക്തിയെ ക്യാപ്റ്റൻ കൂൾ എന്നും വിളിക്കാമെന്ന് ആനന്ദ് മഹീന്ദ്ര ട്വീറ്റ് ചെയ്തു.
This was apparently at the Kabini Reserve last Thursday. I hereby anoint the man at the wheel as the best Bolero driver in the world & also nickname him Captain Cool. pic.twitter.com/WMb4PPvkFF
— anand mahindra (@anandmahindra) September 12, 2022
36 സെക്കന്റ് വീഡിയോയാണ് സോഷ്യൽ മീഡിയയിൽ പ്രചരിക്കുന്നത്. ചിന്നം വിളിച്ചുകൊണ്ട് പാഞ്ഞടുക്കുന്ന കാട്ടാനയെ കണ്ടതോടെ ഇദ്ദേഹം വണ്ടി പിന്നോട്ടെടുക്കുകയായിരുന്നു. പിന്മാറാൻ തയ്യാറല്ലെന്ന് വെല്ലുവിളിച്ചുകൊണ്ട് ആനയും പാഞ്ഞടുത്തു. എന്നാൽ ഡ്രൈവറുടെ കൈയ്യോ മനസ്സോ അതിന് മുന്നിൽ പതറിയില്ല, അതിവേഗത്തിൽ അദ്ദേഹം വാഹനം പിന്നോട്ടെടുത്തുകൊണ്ടേയിരുന്നു. തൊട്ടടുത്ത് വരെ ആന എത്തിയെങ്കിലും അതിന് ഒന്നും ചെയ്യാനായില്ല. പിന്നാലെ നാണം കെട്ട് ആന ദിശമാറി പോകുന്നതും കാണാനാകും.
വീഡിയോ വൈറലായതോടെ പ്രതികരണവുമായി നിരവധി പേർ രംഗത്തെത്തുന്നുണ്ട്. ഡ്രൈവറുടെ ശാന്തവും വേഗത്തിലുള്ളതുമായ പ്രവർത്തനമാണ് അവരെ രക്ഷിച്ചത് എന്നുള്ള പ്രതികരണങ്ങളാണ് ലഭിക്കുന്നത്. കാര്യങ്ങൾ കൈവിട്ട് പോകുമ്പോൾ എങ്ങനെ ശാന്തതയോടെ പെരുമാറണമെന്ന് അദ്ദേഹം കാണിച്ചു തരുന്നു എന്ന കമന്റുകളും ലഭിക്കുന്നുണ്ട്.
Comments