ഇന്ന് ലോകമാകെ അഭിമുഖീകരിക്കുന്ന പ്രധാന പ്രശ്നങ്ങളിലൊന്നാണ് കാലാവസ്ഥാ വ്യതിയാനം. ഓസോൺ പാളികളിൽ സംഭവിക്കുന്ന വിള്ളൽ നമ്മുടെ ഭൂപ്രകൃതിയെ തന്നെ മാറ്റി മറിച്ചു കൊണ്ടിരിക്കുകയാണ്. പ്രധാന ഭൂപ്രദേശങ്ങൾക്ക് പുറമെ ആർട്ടിക്ക, അന്റാർട്ടിക്ക മേഖലകളേയും ഓസോൺ ശോഷണം ഗുരുതരമായ രീതിയിലാണ് ബാധിക്കുന്നത്. കാർബൺ ബഹിർഗമനമാണ് ഓസോൺ പാളികളിലെ വിള്ളലിന്റെ പ്രധാന കാരണമായി പറഞ്ഞു വരുന്നത്. എന്നാൽ ആർട്ടിക്കിൽ നടത്തിയ ഗവേഷണത്തിൽ ഓസോൺ ശോഷണത്തിന് മറ്റൊരു കാരണം കൂടി കണ്ടെത്തിയിരിക്കുകയാണ് ശാസ്ത്രജ്ഞർ.
അയഡിൻ ആണ് ഈ പട്ടികയിലേക്ക് ചേർക്കപ്പെട്ടത്. പുണെയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മെറ്റീരിയോളജിയിൽ നിന്ന് ഉൾപ്പെടെ 20ഓളം രാജ്യങ്ങളിൽ നിന്നുള്ള നൂറിലധികം ഗവേഷകർ, സ്വിറ്റ്സർലൻഡിലെ എക്സ്ട്രീം എൻവയോൺമെന്റ് റിസർച്ച് ലബോറട്ടറി, സൈപ്രസ് ഇൻസ്റ്റിറ്റ്യൂട്ട്, എൻഒഎഎ ഫിസിക്കൽ സയൻസസ് ലബോറട്ടറി എന്നിവർ സംയുക്തമായി നടത്തിയ പഠനത്തിലാണ് ഇത് കണ്ടെത്തിയത്. അയഡിനും ഓസോണും തമ്മിലുള്ള രാസപ്രവർത്തനം ഓസോൺ പാളികളിൽ വിള്ളലുണ്ടാക്കുന്നുവെന്നാണ് കണ്ടെത്തൽ. കാർബൺ ബഹിർഗമനം കഴിഞ്ഞാൽ ഓസോൺ പാളിയെ നശിപ്പിക്കുന്ന രണ്ടാമത്തെ കാരണം ഇതാണെന്നും ഗവേഷകർ ചൂണ്ടിക്കാട്ടുന്നു.
2020 മാർച്ച് മുതൽ ഒക്ടോബർ വരെയാണ് ഗവേഷക സംഘം ആർട്ടിക് മേഖലയിൽ പഠനം നടത്തിയത്. ആർട്ടിക്കിലെ മഞ്ഞുരുകുന്നതിനും പ്രദേശം ചുരുങ്ങുന്നതിനും അയഡിൻ കാരണമാകും. ഭാവിയിൽ ഗുരുതരമായ പ്രത്യാഘാതമാണ് ഇതുവഴി സംഭവിക്കുന്നതെന്നും ഇവർ പറയുന്നു. ജേണൽ നേച്ചർ ജിയോസയൻസസിൽ ആണ് ഈ കണ്ടെത്തലുകൾ പ്രസിദ്ധീകരിച്ചിരിക്കുന്നത്. അന്തരീക്ഷത്തിന്റെ 10 കിലോമീറ്റർ താഴെയുള്ള ട്രോപോസ്ഫിയറിലും ഭൂനിരപ്പിൽ നിന്ന് 10 മുതൽ 50 കിലോമീറ്റർ വരെയായി വ്യാപിച്ച് കിടക്കുന്ന സ്ട്രാറ്റോസ്ഫിയറിലുമായിട്ടാണ് ഓസോൺ പാളി വ്യാപിച്ച് കിടക്കുന്നത്. സൂര്യനിൽ നിന്നുള്ള ഹാനികരമായ അൾട്രാവയലറ്റ് വികിരണങ്ങളിൽ നിന്ന് നമ്മെ സംരക്ഷിക്കുന്ന കവചമായിട്ടാണ് ഓസോൺ പാളി പ്രവർത്തിക്കുന്നത്.
Comments