കൊൽക്കത്ത: പശ്ചിമ ബംഗാളിൽ സഹകരണ സൊസെെറ്റി തിരഞ്ഞെടുപ്പിൽ മമത ബാനർജിയുടെ തൃണമൂൽ കോൺഗ്രസിനെ തകർത്ത് തരിപ്പണമാക്കി ബിജെപി. നന്ദിഗ്രാമിലെ ബുകൂതിയ സമാബെ കൃഷി സമിതിയിലേക്ക് നടന്ന തിരഞ്ഞെടുപ്പിലാണ് ബിജെപി ഉജ്ജ്വല വിജയം നേടി. 12 സീറ്റുകളിലേക്ക് നടന്ന തിരഞ്ഞെടുപ്പിൽ 11 സീറ്റുകളും പിടിച്ചായിരുന്നു തൃണമൂൽ സർക്കാരിന് ബിജെപി ചുട്ട മറുപടി നൽകിയത്.
വൈകീട്ടോടെയായിരുന്നു ഫലങ്ങൾ ഔദ്യോഗികമായി പ്രഖ്യാപിച്ചത്. കേവലം ഒരു വോട്ടിന്റെ ഭൂരിപക്ഷത്തിലാണ് തൃണമൂൽ കോൺഗ്രസിന് ഒരു സീറ്റ് നേടാൻ കഴിഞ്ഞത്. തോൽക്കുമെന്ന സൂചനകൾ ലഭിച്ചതോടെ തൃണമൂൽ പ്രവർത്തകർ സൊസെെറ്റിക്ക് മുൻപിൽ സംഘർഷം ഉണ്ടാക്കാനും ശ്രമം നടത്തിയിരുന്നു.
പ്രതിപക്ഷ നേതാവ് സുവേന്ദു അധികാരിയുടെ മണ്ഡലമാണ് നന്ദിഗ്രാം. കഴിഞ്ഞ നിയമസഭാ തിരഞ്ഞെടുപ്പിൽ മമത ബാനർജിയെ സുവേന്ദു അധികാരി മണ്ഡലത്തിൽ പരാജയപ്പെടുത്തിയിരുന്നു. ഇതിന് പിന്നാലെയാണ് സഹകരണ സൊസെെറ്റിയിലെ ബിജെപിയുടെ തേരോട്ടം. നന്ദിഗ്രാം ജനത തൃണമൂൽ കോൺഗ്രസിനെ പൂർണമായും തിരസ്‌കരിച്ചതിനുള്ള സൂചനയാണ് ഇത്. നന്ദിഗ്രാം വെടിവെയ്പ് ഉൾപ്പെടെയുളള സംഭവങ്ങളിൽ തൃണമൂൽ വലിയ വേരോട്ടമുണ്ടാക്കിയ മണ്ഡലമാണിത്.
