വിവാഹം ജീവിതത്തിൽ ഒന്നേയുള്ളൂ, അത് അത്രയും ആർഭാടമായി നടത്തണം എന്ന് ചിന്തിക്കുന്നവരാണ് ഭൂരിഭാഗം പേരും. അതുകൊണ്ട് തന്നെ കല്യാണ മേക്കപ്പ് മുതൽ ഫോട്ടോഷൂട്ട് വരെ അതിഗംഭീരമാക്കണമെന്ന് എല്ലാവരും ആഗ്രഹിക്കും. ട്രെൻഡിനനുസരിച്ച് നീങ്ങുന്നതുകൊണ്ട് വിവാഹത്തിന്റെ മാത്രമല്ല ഫോട്ടോഷൂട്ടിന്റെയും തീം ഓരോ ദിവസവും മാറിക്കൊണ്ടിരിക്കും. അടുത്തിടെയായി നിരവധി ഫോട്ടോഷൂട്ടുകൾ അത്തരത്തിൽ വൈറലായിട്ടുമുണ്ട്. എന്നാൽ അതിൽ നിന്നെല്ലാം വ്യത്യസ്തമായി പൊതുജനങ്ങളുടെ പ്രശ്നം ചൂണ്ടിക്കാണിക്കുന്ന ഒരു പ്രതിഷേധ ഫോട്ടോഷൂട്ടാണ് ഇപ്പോൾ സമൂഹമാദ്ധ്യമങ്ങളിൽ ശ്രദ്ധ നേടുന്നത്.
പൊട്ടിപ്പൊളിഞ്ഞ, കുണ്ടും കുഴിയും നിറഞ്ഞ റോഡിലാണ് ഫോട്ടോഷൂട്ട് നടത്തിയത്. നിലമ്പൂർ പൂക്കോട്ടുംപാടം സ്വദേശി സുജീഷയാണ് തന്റെ വിവാഹ ദിനത്തിൽ പൊട്ടിപ്പൊളിഞ്ഞ റോഡിൽ ഫോട്ടോഷൂട്ട് നടത്തിയത്. റോഡിന്റെ മോശം അവസ്ഥയിൽ പ്രതിഷേധിച്ചാണ് വിവാഹ ഫോട്ടോഷൂട്ട്. പ്രദേശത്തെ റോഡിന്റെ ശോചനീയാവസ്ഥ അറിയിക്കുക എന്നതായിരുന്നു ലക്ഷ്യം.
പൊട്ടിപ്പൊളിഞ്ഞ റോഡിൽ ചെളി കെട്ടിക്കിടക്കുന്നത് വീഡിയോയിൽ കാണാനാകും. കുഴിയിൽ വെള്ളവും ചെളിയും നിറഞ്ഞ് കിടക്കുകയാണ്. ഇതിനിടയിലൂടെ വിവാഹവേഷത്തിൽ നടന്നുവരുന്ന വധുവിനെയും വീഡിയോയിൽ കാണാം.
‘ആരോ വെഡ്ഡിങ്’ കമ്പനിയിലെ ആഷിഖാണ് ആശയവുമായി മുന്നോട്ടെത്തിയത്. ഇത് സുജീഷയോട് പറഞ്ഞപ്പോൾ തന്നെ സമ്മതിച്ചു. അതോടെയാണ് വ്യത്യസ്തമായ ഈ വിവാഹ ഫോട്ടോഷൂട്ട് സംഭവിച്ചത്.
എന്തായാലും വീഡിയോയ്ക്ക് മികച്ച പ്രതികരണങ്ങളാണ് ലഭിക്കുന്നത്. റോഡപകടങ്ങൾ വർദ്ധിക്കുന്ന ഈ കാലഘട്ടത്തിൽ ഇത്തരത്തിലുളള വീഡിയോകൾ കൂടുതൽ അവബോധം സൃഷ്ടിക്കുമെന്നാണ് വിലയിരുത്തൽ.
Comments