പറ്റ്‌ന: ബിജെപി നേതാവും ബിഹാർ മുൻ ഉപമുഖ്യമന്ത്രിയുമായ സുശീൽ മോദിയ്ക്ക് വധ ഭീഷണി. അദ്ദേഹത്തിന്റെ പരാതിയിൽ പോലീസ് അന്വേഷണം ആരംഭിച്ചു. ഇന്നലെയായിരുന്നു സുശീൽ മോദിയുടെ വീട്ടിലേക്ക് ഭീഷണിക്കത്ത് ലഭിച്ചത്.
തൃണമൂൽ കോൺഗ്രസ് നേതാവാണെന്ന് സ്വയം പരിചയപ്പെടുത്തിക്കൊണ്ടുള്ള വ്യക്തിയിൽ നിന്നാണ് സുശീൽ കുമാർ മോദിയ്ക്ക് കത്ത് ലഭിച്ചിട്ടുള്ളത്. അടുത്ത പ്രധാനമന്ത്രി മമതാ ബാനർജിയായിരിക്കണമെന്ന് കത്തിൽ പറയുന്നു. മമതാ ബാനർജിയ്‌ക്കും, നിതീഷ് കുമാറിനും സിന്ദാബാദ്. തടസ്സം നിന്നാൽ നിങ്ങളെ കൊന്ന് കളയുമെന്നും കത്തിൽ ഭീഷണിപ്പെടുത്തുന്നുണ്ട്.
സ്പീഡ് പോസ്റ്റ് വഴിയാണ് കത്ത് വന്നിരിക്കുന്നത്. കത്തിൽ ചാമ്പ സോമ എന്ന് എഴുതി ഒപ്പിട്ടുണ്ട്. ബംഗാളിലെ പൂർബ ബർധമാൻ സ്വദേശിയാണെന്നും കത്തിൽ പറഞ്ഞിട്ടുണ്ടെന്ന് പോലീസ് വ്യക്തമാക്കി.
