തിളങ്ങുന്ന ചർമ്മ പലരുടെയും സ്വപ്നമായിരിക്കും. മേയ്ക്കപ്പ് ഇല്ലാതെ തന്നെ ചർമ്മം തിളങ്ങണമെന്നും അത് ദിവസം മുഴുവൻ നിലനിൽക്കണമെന്നും ആഗ്രഹിക്കുന്നവരാകും നമ്മളിൽ പലരും. ഇതിനായി നിരവധി മരുന്നുകളും ക്രീമുകളും നാം ഉപയോഗിക്കാറുമുണ്ട്, എന്നാൽ എല്ലാത്തിനും ഫലം കണ്ടെന്ന് വരില്ല.
തിളങ്ങുന്ന ചർമ്മത്തിനായി വീട്ടിൽ തന്നെ ട്രീറ്റ്മെന്റ് നടത്താൻ സാധിക്കുന്ന ഈ കാലത്ത് നാമെന്തിന് അത് തേടി പുറത്ത് പോകണം. അത്തരത്തിൽ വീട്ടിൽ തന്നെ ഉണ്ടാക്കാൻ സാധിക്കുന്ന മിശ്രതത്തെക്കുറിച്ചാണ് ഇവിടെ പറയുന്നത്. കൊറിയൻ രീതിയിലുള്ള ഫേഷ്യലാണ് ഇത്. മൂന്ന് ചേരുവകൾ മാത്രമേ നമുക്ക് ഈ മിശ്രിതമുണ്ടാക്കാൻ ആവശ്യമുള്ളൂ.
കഞ്ഞിവെള്ളം, കറ്റാർവാഴ, വൈറ്റമിൻ സി ഓയിൽ എന്നിവയാണ് ഇതിന് വേണ്ടത്. വീട്ടിൽ ചോറുണ്ടാക്കുമ്പോൾ ബാക്കി വരുന്ന കഞ്ഞിവെളളം ഉപയോഗിച്ചാൽ മതിയാകും. അത് പുളിപ്പിച്ചതാണെങ്കിൽ കുറച്ച് കൂടി നല്ലത്. തിളങ്ങുന്ന, ചുളിവുകൾ ഇല്ലാത്ത ചർമ്മത്തിനായി കഞ്ഞിവെള്ളം ഉപയോഗിക്കാവുന്നതാണ്. മുടിയുടെ ആരോഗ്യവും ഇത് വർദ്ധിപ്പിക്കും.
അടുത്ത ചേരുവ കറ്റാർ വാഴയാണ്. ആരേഗ്യവും സൗന്ദര്യവും മുടിയഴകും വർദ്ധിപ്പിക്കുന്ന കറ്റാർവാഴ ഇന്ന് വിപണിയിൽ നിറഞ്ഞുനിൽക്കുന്ന ഒന്നാണ്. ഇതിലെ വൈറ്റമിൻ ഇ ചർമത്തിന് വളരെ നല്ലതാണ്.
അടുത്തതായി വേണ്ടത് വൈറ്റമിൻ ഇ കാപ്സ്യൂളാണ്. ഹൈപ്പർപിഗ്മെന്റേഷൻ നിയന്ത്രിക്കുന്നതിനും ചർമ്മത്തെ പ്രകൃതിദത്തമായി പോഷിപ്പിക്കുന്നതിനും ഇത് സഹായിക്കുന്നു. ചുളിവുകൾ, പാടുകൾ, ചർമ്മവീക്കം, മുഖക്കുരു, അൾട്രാവയലറ്റ് രശ്മികളുടെ ദോഷകരമായ ഫലങ്ങൾ, സൂര്യാഘാതം എന്നിവയിൽ നിന്ന് ചർമ്മത്തെ സംരക്ഷിക്കാൻ ഇത് സഹായിക്കും. വൈറ്റമിൻ ഇ ക്യാപ്സ്യൂളുകൾ മെഡിക്കൽ ഷോപ്പുകളിലും മറ്റും ലഭ്യമാണ്.
തയ്യാറാക്കുന്ന വിധം-
പുളിച്ച കഞ്ഞിവെള്ളത്തിൽ കറ്റാർവാഴ ജെല്ല് ചേർത്തിളക്കണം. ഇതിലേക്ക് വൈറ്റമിൻ ഇ ക്യാപ്സ്യൂളും പൊട്ടിച്ച് ചേർത്ത് ഇളക്കണം. ക്രീം ആകുന്നത് വരെ ഇവ മിക്സ് ചെയ്യണം. ഫ്രിഡ്ജിൽ വെച്ചോ അല്ലാതെയോ ഇവ ഉപയോഗിക്കാം.
മിശ്രിതം മുഖത്ത് പുരട്ടുന്നതിന് മുൻപ് നന്നായി കഴുകണം. മുഖം വൃത്തിയായി തുടച്ച ശേഷം ഈ ക്രീം വെച്ച് മസാജ് ചെയ്യാം. അൽപനേരം മസാജ് ചെയ്ത് മുഖം കഴുകാം. കാര പോലുള്ള പ്രശ്നങ്ങളുണ്ടെങ്കിൽ മുഖത്ത് ആദ്യം ആവി പിടിയ്ക്കുക. പിന്നീട് ഐസ് മസാജ് ചെയ്ത ശേഷം ഈ മിശ്രിതം ചേർത്ത് മസാജ് ചെയ്യുന്നതാണ് കൂടുതൽ നല്ലത്. കുറച്ച് ദിവസങ്ങൾക്കുള്ളിൽ നിങ്ങളുടെ മുഖവും തിളങ്ങും.. കണ്ണാടി പോലെ.
