കോട്ടയം : കൊറോണ കാലത്ത് കാണാതായ രതീഷ് രണ്ട് വർഷത്തിന് ശേഷം തിരിച്ചെത്തി. പരിയാരം സ്വദേശി ഉഷ എന്ന വീട്ടമ്മ വളർത്തുന്ന പൂച്ചയെയാണ് രണ്ട് വർഷം മുമ്പ് കാണാതായത്. ഓണസമ്മാനം എന്ന പോലെ പൂച്ച തിരിച്ചെത്തിയ സന്തോഷത്തിലാണ് വീട്ടുകാർ.
2016 ലാണ് ഉഷയ്ക്ക് പൂച്ചയെ ലഭിക്കുന്നത്. മലയാള ചിത്രമായ കട്ടപ്പനയിലെ ഹൃത്വിക് റോഷൻ എന്ന ചിത്രത്തിലെ ഡയലോഗിൽ നിന്നാണ് പൂച്ചയ്ക്ക് രതീഷ് എന്ന് പേരിട്ടത്. വളരെ വേഗം തന്നെ കുടുംബാംഗങ്ങളോടും പ്രദേശവാസികളോടും രതീഷ് ഇണങ്ങിയിരുന്നു. പിന്നാലെ അടുത്ത വർഷം രതീഷിന്റെ വലത് കാൽ ഒടിഞ്ഞു.
ആറായിരം രൂപ ചിലവഴിച്ചാണ് ഉഷയും കുടുംബവും രതീഷിന്റെ ശസ്ത്രക്രീയ നടത്തിയത്. പിന്നാലെ ലോക്ക്ഡൗണിൽ പൂച്ചയെ കാണാതാവുകയായിരുന്നു. തിരച്ചിൽ നടത്തിയെങ്കിലും രതീഷിനെ കണ്ടെത്താൻ സാധിച്ചിരുന്നില്ല.
എന്നാൽ ഓണത്തിന്റെ സമയത്താണ് രതീഷ് തിരിച്ചെത്തിയത്. അയൽവാസിയുടെ വീട്ടിലാണ് ആദ്യം എത്തിയത്. പിന്നാലെ ഓടിയെത്തി മണം പിടിച്ച് മുട്ടിയുരുമി ഒപ്പം കൂടുകയായിരുന്നെന്ന് വീട്ടുകാർ പറയുന്നു. ഉഷയുടെ അയൽവാസിയാണ് രതീഷിന്റെ നാടുവിടലും തിരിച്ചുവരവുമെല്ലാം സമൂഹമാദ്ധ്യമത്തിലൂടെ പുറത്ത് വിട്ടത്. വിവരം അറിഞ്ഞ് രതീഷിനെ തേടി ദേശീയ മാദ്ധ്യമങ്ങൾ വരെ എത്തിയെന്ന് ഇവർ പറയുന്നു.
Comments