ഇന്ന് ജീൻസിന്റെ ആരാധകരാണ് ഭൂരിഭാഗം ആളുകളും. പ്രായ-ലിംഗ ഭേദമന്യേ എല്ലാവർക്കും ഉപയോഗിക്കാമെന്നതും പെട്ടെന്ന് കഴുകേണ്ടതില്ലെന്നതും ജീൻസിനെ പ്രിയപ്പെട്ടതാക്കുന്നു. ധരിക്കാൻ വളരെ എളുപ്പമുള്ളതു കൊണ്ട് തന്നെ ജീൻസ് ആരാധകർ വർദ്ധിക്കുന്നു.
എന്നാൽ കാലങ്ങളോളം ഉപയോഗിച്ച ജീൻസ് ഇറുക്കം ആവുന്നതോ അല്ലെങ്കിൽ നരച്ച് പോവുന്നതോ എല്ലാം പലപ്പോഴും അൽപം പ്രയാസപ്പെടുത്തുന്നത് തന്നെയാണ്. കാരണം അത്രയേറെ പ്രിയപ്പെട്ട ജീൻസ് ഒഴിവാക്കുക എന്നത് പലപ്പോഴും മനപ്രയാസം സൃഷ്ടിക്കുന്ന ഒന്നുതന്നെയാണ്. ശരീര ഭാരം വർദ്ധിക്കുന്നതും കുറയുന്നതും വസ്ത്രങ്ങളെയും ബാധിക്കുന്നു. ഇങ്ങനെ ശരീരഭാരത്തിൽ ഏറ്റകുറച്ചിലുകൾ വരുന്നതോടെ ഇഷ്ട വസ്ത്രങ്ങൾ മാറ്റി വെയ്‌ക്കാറാണ് പതിവ്. എന്നാൽ ഇനി മുതൽ ശരീരഭാരം കുറയുന്നതോ കൂടുന്നതോ ഒരു പ്രശ്‌നമേയല്ല. ജീൻസ് ഇനി മുതൽ ആവശ്യാനുസരണം ചെറുതും വലുതുമാക്കി അടിപൊളിയായി നടക്കാനുള്ള ചില നുറുങ്ങു വിദ്യകളിതാ..
ജീൻസ് ഇറുകിയതെങ്കിൽ
ഒരു പക്ഷേ ഇറുകിയ ജീൻസ് വീണ്ടും ഉപയോഗിക്കാൻ കഴിയുമെന്ന് പറഞ്ഞാൽ വിശ്വസിക്കാൻ കഴിയില്ലായിരിക്കും. എന്നാൽ അങ്ങനെ സാധിക്കുമെന്നതാണ് ഉത്തരം. ഒരു സ്പ്രേ കുപ്പിയിൽ ചൂടുവെള്ളം എടുക്കുക. ജീൻസ് ഒരു ഹാംഗറിൽ തൂക്കിയിടുക. അതിന് ശേഷം സ്പ്രേ ബോട്ടിൽ ഉള്ള വെള്ളം ജീൻസിന്റെ തുടയിലും അരക്കെട്ടിലും തളിക്കുക. ഇതിന് ശേഷം ജീൻസ് ഒന്ന് വലിച്ച് ഹാംഗറിൽ വീണ്ടും തൂക്കിയിടുക. 20 മിനിറ്റോളം ഇത് ചെയ്താൽ നിങ്ങൾക്ക് ജീൻസ് പാകമായി വരും. ഇത് വീണ്ടും ഇറുകിയത് ആവുകയാണെങ്കിൽ വീണ്ടും ഇത്തരത്തിൽ ചെയ്യാവുന്നതാണ്.
ജീൻസ് അയഞ്ഞതെങ്കിൽ
അയഞ്ഞ ജീൻസും വളരെ ബുദ്ധിമുട്ട് സൃഷ്ടിക്കും. ശരീരം ഭാരം കുറയ്‌ക്കുന്ന തിരക്കിലായവർ അനുഭവിക്കുന്ന പ്രശ്‌നമാകാം ഇത്. എന്നാൽ ഇതിനും പരിഹാരമുണ്ട്. അതിന് വേണ്ടി അരക്കെട്ടിന്റെ വശത്ത് നിന്ന് ജീൻസ് ഒന്ന് ടക്ക് ഇൻ ചെയ്യണം.
ജീൻസ് നരച്ചതെങ്കിൽ
നരച്ച ജീൻസ് ധരിക്കാൻ ആത്മവിശ്വാസമില്ലാത്തവരാണ് ഭൂരിഭാഗം ആളുകളും. നരച്ചതെന്ന് തോന്നിയാൽ പിന്നെ അങ്ങ് മാറ്റി വെയ്‌ക്കുന്നതാണ് പതിവ്. എന്നാൽ അതിനും പൊടിക്കൈ ഉണ്ട്. അൽപം കളർ ചൂടുവെള്ളത്തിൽ കലർത്തുക. നല്ലതുപോലെ മിക്സ് ചെയ്ത ശേഷം ജീൻസ് അതിൽ മുക്കി വെക്കുക. ഇത്തരത്തിൽ ഒരു 15 മിനിറ്റ് മുക്കി വെക്കണം. അതിലൂടെ നിങ്ങളുടെ മങ്ങിയ ജീൻസിന് നല്ല തിളക്കം വരും എന്ന കാര്യത്തിൽ സംശയം വേണ്ട. ഇത് വളരെ മികച്ച നിറമുള്ള ജീൻസാക്കി മാറ്റാൻ കഴിയും.
ജീൻസ് കഴുകുമ്പോൾ
എല്ലാ വസ്ത്രങ്ങളും കഴുകുന്നത് പോലെ കഴുകേണ്ട വസ്ത്രമല്ല ജീൻസ് എന്നത് ഭൂരിഭാഗം ആളുകൾക്കും അറിയാത്ത വസ്തുതയാണ്. ജീൻസ്ിന്റെ ആയുസ്സ് കൂട്ടുന്നതിനായി കട്ടികുറഞ്ഞ വെള്ളത്തിൽ കഴുകുന്നതാണ് മെച്ചം. അതുപോലെ തന്നെ കല്ലിലിട്ട് അടിച്ച് കഴുകാതിരിക്കുന്നതിനും ശ്രദ്ധിക്കണം. ഇത് കൂടാതെ ജീൻസ് കഴുകി ഉണക്കാനിടുമ്പോൾ അത് പുറം മറിച്ചിടുന്നതിന് ശ്രദ്ധിക്കേണ്ടതാണ്. ജീൻസ് കൈകൊണ്ട് കഴുകുന്നതാണ് ഉത്തമം.കാരണം ഇത് ജീൻസ് ചുരുങ്ങിപ്പോവാതിരിക്കുന്നതിന് സഹായിക്കും.
