പത്തനംതിട്ട: സിപിഎം നേതാക്കളുടെ മാനസിക പീഡനം കാരണം ഗൃഹനാഥൻ ജീവനൊടുക്കിയ സംഭവത്തിൽ ഭാര്യ പരാതി നൽകി. ആത്മഹത്യ ചെയ്ത പത്തനംതിട്ട പെരുനാട് സ്വദേശി ബാബുവിന്റെ ഭാര്യ കുസുമകുമാരിയാണ് പോലീസിന് പരാതി നൽകിയത്. സിപിഎം നേതാക്കൾക്കെതിരെയാണ് പരാതി.
പഞ്ചായത്ത് പ്രസിഡന്റും ലോക്കൽ സെക്രട്ടറിയും മാനസികമായി പീഡിപ്പിക്കുന്നവെന്ന് ചൂണ്ടിക്കാട്ടിയാണ് ജീവനൊടുക്കുന്നതെന്ന് ബാബു ആത്മഹത്യാക്കുറിപ്പിൽ ആരോപിച്ചിരുന്നു.സിപിഎം ജില്ലാ കമ്മിറ്റി അഗംവും പഞ്ചായത്ത് പ്രസിഡന്റുമായ പി.എസ്.മോഹനൻ, വാർഡ് മെമ്പർ വിശ്വൻ, സിപിഎം ലോക്കൽ സെക്രട്ടറി റോബിൻ എന്നിവർക്കെതിരെയാണ് ആരോപണം.
ബാബുവിന്റെ വീടിനോട് ചേർന്നുള്ള പഞ്ചായത്ത് വെയിറ്റിങ് ഷെഡിന്റെ നിർമ്മാണത്തെ ചൊല്ലി മുൻപ് തർക്കമുണ്ടായിരുന്നു. വെയ്റ്റിങ് ഷെഡ് നിർമിക്കാനായി ബാബു മുൻപ് സ്ഥലം വിട്ടുനൽകിയിരുന്നതാണ്. അടുത്തിടെ വെയ്റ്റിങ് ഷെഡിന്റെ വലിപ്പം വർദ്ധിപ്പിക്കാൻ പഞ്ചായത്ത് തീരുമാനിച്ചു. ഇതിന്റെ ഭാഗമായി 2.5 സെന്റ് സ്ഥലം ബലമായി അളന്നെടുത്തെന്നാണ് ബാബുവിന്റെ കുടുംബത്തിന്റെ ആരോപണം.
അതേസമയം ഗൃഹനാഥന്റെ മരണവുമായി പാർട്ടിക്കോ നേതാക്കൾക്കോ ബന്ധമില്ലെന്നാണ് ആരോപണവിധേയരായ നേതാക്കളുടെ പ്രതികരണം.
