ചെന്നൈ: ഐഫോൺ 14 നിർമ്മാണം ഇന്ത്യയിൽ ആരംഭിക്കാനൊരുങ്ങി ആപ്പിൾ. ചെൈന്നക്ക് സമീപമുള്ള ഫോക്സ്കോൺ പ്ലാന്റിലാണ് ഫോണിന്റെ നിർമ്മാണം നടത്തുന്നത്. കഴിഞ്ഞ വർഷത്തെക്കാൾ നേരത്തെയാണ് ഈ വർഷത്തെ ഐഫോൺ മോഡൽ തയ്യാറാക്കുന്നത്. 2025ഓടു കൂടി ഐഫോൺ ഉത്പാദനത്തിന്റെ 25 ശതമാനവും ഇന്ത്യയിലേക്ക് മാറ്റാനാണ് ആപ്പിൾ പദ്ധതിയിടുന്നതെന്നും റിപ്പോർട്ടുകൾ വ്യക്തമാക്കുന്നു. ഇതിന്റെ ഭാഗമായിട്ടാണ് ഐഫോൺ 14 നിർമ്മാണം ഇന്ത്യയിൽ നേരത്തെ തന്നെ ആരംഭിക്കുന്നത്.
ശ്രീപെരുമ്പത്തൂരിൽ നിർമ്മിക്കുന്ന ഐഫോൺ 14 മോഡലുകൾ പിന്നീട് കയറ്റുമതി ചെയ്യും. ഐഫോൺ 14 ഇന്ത്യയിൽ നിർമ്മിക്കുന്നതിൽ തങ്ങൾ ഏറെ ആവേശഭരിതരാണെന്നാണ് കമ്പനി ഔദ്യോഗിക പ്രസ്താവനയിൽ പറയുന്നത്. അത്യാധുനിക ടെക്നോളജികളും ഏറ്റവും നൂതനമായ സുരക്ഷാ സംവിധാനങ്ങളും ഇതിന്റെ ഭാഗമാകുമെന്നും കമ്പനി അവകാശപ്പെട്ടു. ഐഫോൺ 13, ഐഫോൺ 12, ഐഫോൺ എസ്ഇ തുടങ്ങീ നിരവധി ഐഫോൺ മോഡലുകൾ ആപ്പിൾ ഇന്ത്യയിൽ നിർമ്മിക്കുന്നുണ്ട്.
വിസ്ട്രോൺ, ഫോക്സ്കോൺ, പെഗാട്രോൺ എന്നിവരുമായി ചേർന്നാണ് രാജ്യത്ത് ആപ്പിളിന്റെ പ്രവർത്തനം. കേന്ദ്രസർക്കാരിന്റെ പ്രൊഡക്ഷൻ-ലിങ്ക്ഡ് ഇൻസെന്റീവ് (പിഎൽഐ) പദ്ധതിയുമായി നേരിട്ട് ബന്ധപ്പെട്ടായിരിക്കും ഐഫോൺ 14ന്റെ നിർമ്മാണം. ഈ മാസം ആദ്യം പുറത്തിറക്കിയ ഐഫോൺ 14ന്റെ വില 79,900 രൂപയിൽ നിന്നാണ് ആരംഭിക്കുന്നത്. ഇന്ത്യയിൽ നിർമ്മാണം ആരംഭിക്കാനൊരുങ്ങുന്ന സാഹചര്യത്തിൽ ഐഫോൺ 14ന്റെ വില കുറയാൻ സാധ്യതയുണ്ടെന്നും റിപ്പോർട്ടുണ്ട്. എന്നാൽ ഇക്കാര്യത്തിൽ സ്ഥിരീകരണം വന്നിട്ടില്ല.
ഇന്ത്യയിൽ ഐഫോൺ 14 നിർമ്മിക്കുന്നതു വഴി ഇറക്കുമതി തീരുവയിൽ 20 ലാഭിക്കാൻ ആപ്പിളിന് സാധിക്കും. പിന്നീട് ആപ്പിളിന്റെ വിലയിലും മാറ്റങ്ങൾ ഉണ്ടാക്കിയേക്കും. എന്നാൽ ഉടനെ തന്നെ വില കുറയാനുള്ള സാധ്യതയില്ലെന്നാണ് അടുത്ത വൃത്തങ്ങൾ പറയുന്നത്.
