ന്യൂഡൽഹി: ബിജെപി ദേശീയ അദ്ധ്യക്ഷനായി ജെ.പി നദ്ദ തുടർന്നേക്കും. അടുത്ത ലോക്‌സഭാ തിരഞ്ഞെടുപ്പുവരെ തത്സ്ഥാനത്ത് തുടരാനാണ് അദ്ദേഹത്തിന് നേതൃത്വം നൽകിയ നിർദ്ദേശം എന്നാണ് റിപ്പോർട്ടുകൾ. വരാനിരിക്കുന്ന നിയസഭാ തിരഞ്ഞെടുപ്പുകൾ കണക്കിലെടുത്താണ് തീരുമാനം.
മുന്ന് വർഷമാണ് ബിജെപി ദേശീയ അദ്ധ്യക്ഷന്റെ കാലാവധി. ഇത് പ്രകാരം അടുത്ത വർഷം ജനുവരിയിൽ നദ്ദയുടെ കാലാവധി അവസാനിക്കും. എന്നാൽ 2024 വരെ അദ്ദേഹം തന്നെ തുടർന്നാൽ മതിയെന്നാണ് നിലവിലെ തീരുമാനം. ഈ വർഷം ഗുജറാത്ത്, ഹിമാചൽ പ്രദേശ് എന്നീ സംസ്ഥാനങ്ങളിലും, അടുത്ത വർഷം കർണാടക, ത്രിപുര, മേഘാലയ, മിസോറം, മദ്ധ്യപ്രദേശ്, രാജസ്ഥാൻ. ഛത്തീസ്ഗഡ്, തെലങ്കാന എന്നിവിടങ്ങളിലും നിയമസഭാ തിരഞ്ഞെടുപ്പാണ്. ഈ സാഹചര്യത്തിൽ ജെ.പി നദ്ദ നേതൃത്വ സ്ഥാനത്ത് നിന്ന് മാറുന്നത് പാർട്ടിയുടെ പ്രവർത്തനങ്ങളെ പ്രതികൂലമായി ബാധിക്കുമെന്നാണ് വിലയിരുത്തൽ.
2019 ജൂലൈ മുതൽ ബിജെപിയുടെ വർക്കിംഗ് പ്രസിഡന്റ് ആയിരുന്നു ജെ.പി നദ്ദ. തുടർന്ന് 2020 ജനുവരി 20നാണ് അദ്ദേഹം അദ്ധ്യക്ഷ സ്ഥാനത്തേക്ക് വന്നത്. നദ്ദയുടെ മികച്ച പ്രവർത്തനങ്ങൾ ജനങ്ങൾക്കിടയിൽ ബിജെപിയുടെ പ്രീതി ഉയരുന്നതിന് കാരണമായിരുന്നു.
ഇത് ആദ്യമായല്ല തിരഞ്ഞെടുപ്പ് പരിഗണിച്ച് ദേശീയ അദ്ധ്യക്ഷന്റെ കാലാവധി നീട്ടുന്നത്. നേരത്തെ അമിത് ഷാ ദേശീയ അദ്ധ്യക്ഷൻ ആയിരുന്നപ്പോഴും ലോക്‌സഭാ തിരഞ്ഞെടുപ്പ് കണക്കിലെടുത്ത് കാലാവധി നീട്ടി നൽകിയിരുന്നു.
