ഗാന്ധിനഗർ: ഗാന്ധിനഗർ-മുംബൈ സെൻട്രൽ വന്ദേഭാരത് എക്സ്പ്രസിന്റെ ഫ്ളാഗ് ഓഫ് പ്രധാനമന്ത്രി നരേന്ദ്ര മോദി നിർവഹിക്കും. സെപ്റ്റംബർ 29, 30 തീയതികളിൽ ഗുജറാത്ത് സന്ദർശന വേളയിലാകും പ്രധാനമന്ത്രി വന്ദേഭാരത് ട്രെയിൻ ഫ്ലാഗ് ഓഫ് ചെയ്യുക. ഗുജറാത്തിൽ നിരവധി പദ്ധതികൾക്ക് തറക്കല്ലിടുകയും ചെയ്യും. അഹമ്മദാബാദ് മെട്രോ പദ്ധതിയുടെ ഒന്നാം ഘട്ടത്തിന്റെ ഉദ്ഘാടനവും നിർവഹിക്കുമെന്ന് പ്രധാനമന്ത്രിയുടെ ഓഫീസ് അറിയിച്ചു.
സംസ്ഥാനത്ത് നിരവധി പദ്ധതികൾക്കാണ് തുടക്കമാകുന്നത്. ലോകത്തിലെ ആദ്യത്തെ കംപ്രസ്ഡ് നാച്ചുറൽ ഗ്യാസ് (സിഎൻജി) ടെർമിനലിന് മോദി തറക്കല്ലിടും. ഗുജറാത്തിൽ നടക്കുന്ന 36-ാമത് ദേശീയ ഗെയിംസ് ഉദ്ഘാടനം ചെയ്യുകയും ചെയ്യും. ആദ്യമായാണ് ഗുജറാത്തിൽ ദേശീയ ഗെയിംസ് നടക്കുന്നത്.
വേദകാലം മുതൽ ആരാധിക്കപ്പെട്ടിരുന്ന അംബാ ദേവിയുടെ ആരാധാനലയമായ അംബാജിയിലേക്കുള്ള പാതയായ ബ്രോഡ് ഗേജിന്റെ ഉദ്ഘാടനവും പ്രധാനമന്ത്രി നിർവഹിക്കും. പ്രധാനമന്ത്രി ക്ഷേത്രം സന്ദർശിക്കുകയും ആരാധന നടത്തുകയും ചെയ്യും. അഹമ്മദാബാദിൽ നടക്കുന്ന നവരാത്രി ആഘോഷങ്ങളിലും അദ്ദേഹം പങ്കെടുക്കും.
