പ്രമുഖ ഇലക്ട്രിക് ഇരുചക്ര വാഹന നിർമ്മാതാക്കളായ ഒല ഇലക്ട്രിക് തങ്ങളുടെ S1 പ്രോ ഇലക്ട്രിക് സ്കൂട്ടറിന് വില കിഴിവ് പ്രഖ്യാപിച്ചു. ഉപഭോക്താക്കളെ ആകർഷിക്കുന്നതിനും കച്ചവടം മികച്ചതാക്കുന്നതിനുമുള്ള കമ്പനിയുടെ നീക്കമാണ് പുതിയ ഓഫർ. കുറച്ചു നാളുകളിലേയ്ക്ക് മാത്രമായികരിക്കും വില കിഴിവ്. 10,000 രൂപയുടെ കിഴിവാണ് കമ്പനി വാഗ്ദാനം ചെയ്യുന്നത്. 1.40 ലക്ഷം രൂപയാണ് വാഹനത്തിന്റെ എക്സ്ഷോറൂം വില. പുതിയ കിഴിവ് പ്രകാരം Ola S1 പ്രോ 1.30 ലക്ഷം രൂപയ്ക്ക് ലഭിക്കും.
ഏപ്രിലിൽ ഏറ്റവും കൂടുതൽ വിറ്റഴിക്കപ്പെടുന്ന ഇലക്ട്രിക് ഇരുചക്ര വാഹന നിർമ്മാതാക്കളായി ഒല മാറിയിരുന്നു. ഇതോടെ മെയ് മാസത്തിൽ S1 പ്രോയുടെ വില 10,000 രൂപ വർദ്ധിപ്പിക്കാൻ കമ്പനി തീരുമാനിച്ചു. എന്നാൽ പിന്നാലെ വാഹനത്തിന്റെ വില്പന കുറയാൻ തുടങ്ങി. മെയ് മാസത്തിൽ 9,249 യൂണിറ്റുകളിൽ നിന്ന് ഓഗസ്റ്റ് എത്തിയപ്പോഴേയ്ക്കും 3,421 യൂണിറ്റായി കുറഞ്ഞു.
ഇപ്പോൾ, വിൽപ്പന വർദ്ധിപ്പിക്കുന്നതിന്റെ ഭാഗമായാണ് ഒല S1 പ്രോ സ്കൂട്ടറിൽ 10,000 രൂപയുടെ ഓഫർ പ്രഖ്യാപിച്ചിരിക്കുന്നത്. ഒക്ടോബർ 5-വരെയാണ് നിലവിൽ ഓഫർ ഉളളത്. ക്യാഷ് ഡിസ്കൗണ്ട് കൂടാതെ, 5 വർഷത്തെ വിപുലീകൃത വാറന്റിയിൽ 1,500 രൂപ കിഴിവും ഒല വാഗ്ദാനം ചെയ്യുന്നു. കുറഞ്ഞ പലിശ നിരക്ക് 8.99 ശതമാനത്തിൽ നിന്ന് ആരംഭിക്കുന്നു (2.2 ശതമാനം കുറവ്) കൂടാതെ ലോണുകളുടെ പ്രോസസ്സിംഗ് ഫീസും ഇല്ല. മേൽപ്പറഞ്ഞ ഈ ഓഫറുകളും ഒക്ടോബർ 5 വരെ മാത്രമാണ് ലഭിക്കുക.
Comments