ജാപ്പനീസ് ഇരുചക്ര വാഹന ബ്രാൻഡായ കാവസാക്കി അവരുടെ W175 മോട്ടോർസൈക്കിൾ പുറത്തിറക്കി. സ്റ്റാൻഡേർഡ് പതിപ്പിന് 1.47 ലക്ഷം രൂപ മുതൽ 1.49 ലക്ഷം രൂപ വരെയാണ് വില. രണ്ട് കളർ ഓപ്ഷനുകളിലാണ് W175 കമ്പനി വാഗ്ദാനം ചെയ്യുന്നത്. സ്റ്റാൻഡേർഡ് എബോണി, സ്പെഷ്യൽ എഡിഷൻ കാൻഡി പെർസിമോൺ റെഡ് എന്നിങ്ങനെയാണ് രണ്ട് വേരിയന്റുകൾ. റോയൽ എൻഫീൽഡ് ഹണ്ടർ 350, ടിവിഎസ് റോണിൻ എന്നിവയുടെ അതേ വിലയിലാണ് W175 ഇന്ത്യൻ വിപണിയിൽ മത്സരിക്കാൻ എത്തിയിരിക്കുന്നത്.
7500 ആർപിഎമ്മിൽ 13 പിഎസ് കരുത്തും 6000 ആർപിഎമ്മിൽ 13.3 എൻഎം ടോർക്കും ഉൽപ്പാദിപ്പിക്കുന്ന 177 സിസി എയർ കൂൾഡ് എഞ്ചിനുമായാണ് W175 എത്തിയിരിക്കുന്നത്. ഫ്യുവൽ ഇഞ്ചക്ഷൻ, സിംഗിൾ-ചാനൽ എബിഎസ്, സെമി-ഡിജിറ്റൽ ഇൻസ്ട്രുമെന്റ് ക്ലസ്റ്റർ, സിംഗിൾ പീസ് സീറ്റ് തുടങ്ങിയ സവിശേഷതകളും വാഹനത്തിനുണ്ട്. 135 കിലോഗ്രാം ഭാരമുള്ള W175-ന് 12 ലിറ്റർ ഇന്ധന ടാങ്കും 790 എംഎം സീറ്റ് ഉയരവും 165 എംഎം ഗ്രൗണ്ട് ക്ലിയറൻസുമുണ്ട്.
ഡബിൾ ക്രാഡിൽ ചേസിസിലാണ് W175 നിർമ്മിച്ചിരിക്കുന്നത്. സസ്പെൻഷനായി ടെലിസ്കോപ്പിക് ഫ്രണ്ട് ഫോർക്കുകളും ഇരട്ട പിൻ സ്പ്രിംഗുകളും നൽകിയിരിക്കുന്നു. മുൻവശത്ത് 270 എംഎം ഡിസ്ക് ബ്രേക്കും പിന്നിൽ 110 എംഎം ഡ്രം ബ്രേക്കും വാഹനത്തിനുണ്ട്. ബൈക്കിന്റെ അടിസ്ഥാന മോഡലിന് 1,47,000 രൂപയും, ബോൾഡ് പെയിന്റ് തീമിൽ ലഭിക്കുന്ന സ്പെഷ്യൽ എഡിഷന്റെ വില 1,49,000 രൂപയുമാണ്. വില അടിസ്ഥാനത്തിൽ ഹണ്ടർ 350 , ടിവിഎസ് റോണിൻ എന്നിവയ്ക്കെതിരെ W175 മത്സരിക്കുമ്പോൾ, നിരത്തിൽ യമഹ FZ-X ആണ് പ്രധാന എതിരാളി.
Comments