പൂനെ: ജർമ്മൻ പ്രീമിയം കാർ നിർമ്മാതാക്കളായ മെഴ്സിഡസ് ബെൻസിനോട് കാറുകളുടെ ഉൽപാദനം പ്രാദേശികമായി വർധിപ്പിക്കണമെന്ന് കേന്ദ്രമന്ത്രി നിതിൻ ഗഡ്കരി. ഇന്ത്യയിൽ മിഡിൽ ക്ലാസ് ജനങ്ങളാണ് കൂടുതലായിട്ടുള്ളതെന്നും അവർക്ക് ബെൻസ് ‘താങ്ങാൻ’ കഴിയില്ലെന്നും അദ്ദേഹം നിർമാതാക്കളോട് പറഞ്ഞു.
കൂടുതൽ കാറുകൾ പ്രാദേശികമായി നിർമ്മിക്കണം. അതുവഴി ഉൽപാദനച്ചിലവ് കുറക്കാനാകുമെന്നും താങ്ങാവുന്ന വിലയിൽ ഇന്ത്യയിലെ ജനങ്ങൾക്ക് കാർ വിതരണത്തിനെത്തിക്കാമെന്നും അദ്ദേഹം അഭിപ്രായപ്പെട്ടു. മെഴ്സിഡസ് – ബെൻസ് പ്രാദേശികമായി അസംബിൾ ചെയ്ത ഇന്ത്യയിലെ ആദ്യത്തെ കേന്ദ്രമായ പൂനെയിലെ ചകൻ നിർമ്മാണ കേന്ദ്രത്തിൽ സംസാരിക്കവെയായിരുന്നു കേന്ദ്രമന്ത്രിയുടെ പരാമർശം. നിലവിലെ ബെൻസിന്റെ വിലയിൽ തനിക്ക് പോലും ഈ ആഡംബര കാർ ‘താങ്ങാൻ’ കഴിയില്ലെന്ന് ഗഡ്കരി ഹാസ്യരൂപേണ പറഞ്ഞു.
”നിങ്ങൾ ഉൽപ്പാദനം വർദ്ധിപ്പിക്കൂ, എങ്കിൽ മാത്രമേ ചിലവ് കുറയ്ക്കാൻ കഴിയൂ. ഇവിടെ ഭൂരിഭാഗവും ‘ഇടത്തരം’ ജനങ്ങളാണ്. എനിക്ക് പോലും നിങ്ങളുടെ കാർ വാങ്ങാൻ കഴിയില്ല,” മന്ത്രി പറഞ്ഞു. രാജ്യത്ത് എക്സ്പ്രസ് ഹൈവേകൾ വരുന്നതോടെ ഇന്ത്യയിൽ മെഴ്സിഡസ് ബെൻസ് കാറുകൾക്ക് കൂടുതൽ വിപണി ലഭിക്കുമെന്നും ഗഡ്കരി കൂട്ടിച്ചേർത്തു.
ജർമ്മൻ കാർ നിർമ്മാതാക്കളായ മെഴ്സിഡസ് ബെൻസിന്റെ ഏറ്റവും പുതിയ ഇലക്ട്രിക് വാഹനമാണ് Mercedes EQS 580 4MATIC EV. 1.55 കോടി രൂപയാണ് ഇതിന്റെ വില.
Comments