ലാഹോർ: പാകിസ്താനിലെ ഒരു റെസ്റ്റോറന്റിൽ വെള്ളത്തിന് പകരം ആസിഡ് നൽകിയതിനെ തുടർന്ന് കുട്ടികൾക്ക് പൊള്ളലേറ്റതായി റിപ്പോർട്ട്. സംഭവത്തിൽ റെസ്റ്റോറന്റ് മാനേജറെ ലാഹോർ പോലീസ് അറസ്റ്റ് ചെയ്തു. സെപ്റ്റംബർ 27-നായിരുന്നു കേസിനാസ്പദമായ സംഭവം.
ചരിത്രപ്രസിദ്ധമായ ഗ്രേറ്റർ ഇഖ്ബാൽ പാർക്കിലെ ‘പോയറ്റ്’ റെസ്‌റ്റോറന്റിലായിരുന്നു ആസിഡ് വിളമ്പിയത്. ഒരു ജന്മദിന പാർട്ടി നടക്കവെ ചടങ്ങിൽ പങ്കെടുക്കാനെത്തിയ രണ്ട് കുട്ടികൾക്ക് വെള്ളത്തിന് പകരം ആസിഡ് നൽകുകയായിരുന്നു. വെള്ളമാണെന്ന് കരുതി കുട്ടികൾ ആസിഡ് എടുത്ത് കുടിക്കുകയും കൈ കഴുകുകയും ചെയ്തു. ഗുരുതരാവസ്ഥയിലായ ഇരുവരും ഇപ്പോഴും ആശുപത്രിയിൽ ചികിത്സയിലാണ്. കുട്ടികളിലൊരാൾക്ക് രണ്ടര വയസ് മാത്രമാണ് പ്രായം.
സംഭവത്തിൽ റെസ്റ്റോറന്റ് മാനേജർക്കും മറ്റ് അഞ്ച് ജീവനക്കാർക്കുമെതിരെ പോലീസ് കേസെടുത്തിട്ടുണ്ട്. റെസ്റ്റോറന്റ് മാനേജർ മുഹമ്മദ് ജാവേദ് നിലവിൽ അറസ്റ്റിലാണ്. അന്വേഷണം പൂർത്തിയാകുന്നത് വരെ റെസ്റ്റോറന്റ് അടച്ചിടുമെന്നും പോലീസ് അറിയിച്ചു.
