ലഡാക്ക് : ചൈനയിൽ നിന്നുളള വെല്ലുവിളികൾ നേരിടാൻ വായുസേന എപ്പോഴും സുസജ്ജമാണെന്ന് വ്യോമസേനാ മേധാവി എയർ ചീഫ് മാർഷൽ വി.ആർ ചൗധരി. ലോകത്താകമാനം സമീപ കാലങ്ങളിൽ നടന്ന സംഭവ വികാസങ്ങൾ ചൂണ്ടിക്കാണിക്കുന്നത് ശക്തമായ ഒരു സൈന്യത്തിന്റെ ആവശ്യകതയാണെന്നും അദ്ദേഹം വ്യക്തമാക്കി. ഒക്ടോബർ എട്ടിന് എയർഫോഴ്സ് ദിനത്തിന് മുന്നോടിയായി നടത്തിയ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.
എല്ലാ സുരക്ഷാ വെല്ലുവിളികളെയും നേരിടാൻ ഇന്ത്യൻ വ്യോമസേന തയ്യാറെടുക്കുകയാണ്. ഏത് സാഹചര്യത്തെ നേരിടാനും സൈന്യം തയ്യാറാണെന്നും അദ്ദേഹം വ്യക്തമാക്കി. ഇതിന്റെ ഭാഗമായി ജാഗ്രത കർശനമാക്കുകയും പ്രദേശത്ത് സേനയെ വിന്യസിക്കുകയും ചെയ്യുന്നുണ്ട്. നിയന്ത്രണ രേഖക്ക് അടുത്ത് ചൈന നടത്തുന്ന എല്ലാ പ്രവർത്തങ്ങളും നിരീക്ഷിക്കുന്നുണ്ടെന്നും അദ്ദേഹം കൂട്ടിച്ചേർത്തു.
ചൈനീസ് വിമാനങ്ങൾ നിയന്ത്രണ രേഖക്ക് സമീപം പറക്കുന്ന സംഭവങ്ങൾ സമീപകാലത്ത് റിപ്പോർട്ട് ചെയ്യുന്നുണ്ട്. ചൈനയുടെ ഈ പ്രവർത്തനത്തിനെതിരെ വേണ്ടുന്ന നടപടികൾ സ്വീകരിച്ചിട്ടുണ്ട്. ഒപ്പം ഇത് സംബന്ധിച്ച് ചൈനയ്ക്ക് മുന്നറിയിപ്പും നൽകിയിട്ടുണ്ട്. കിഴക്കൻ ലഡാക്കിലെ സ്ഥിതിഗതികൾ സാധാരണ നിലയിലേക്ക് തിരികെ പോകുന്നതിന് വേണ്ട കാര്യങ്ങളും ചെയ്തു വരുന്നുണ്ടെന്നും അദ്ദേഹം വ്യക്തമാക്കി.
സൈന്യത്തിന്റെ തിയറ്ററൈസേഷൻ പദ്ധതിയെക്കുറിച്ച ആരാഞ്ഞപ്പോൾ ഭാവിയുദ്ധങ്ങളിൽ നാവികസേനയുടെയും കരസേനയുടെയും സഹകരണവും ആസൂത്രണവും ഉറപ്പിക്കേണ്ടതിന്റെ അനിവാര്യതയെക്കുറിച്ച് ബോദ്ധ്യമുണ്ടെന്ന് ആയിരുന്നു അദ്ദേഹത്തിന്റെ മറുപടി.
Comments