കറികളിൽ കേമനാണ് മാമ്പഴ പുളിശ്ശേരി. ഇതില്ലാത്ത സദ്യവട്ടത്തെക്കുറിച്ച് മലയാളികൾക്ക് ചിന്തിക്കാൻകൂടി കഴിയില്ല. നല്ല പഴുത്ത മാങ്ങയും തൈരും തേങ്ങയും എല്ലാം ചേർത്ത് ഉണ്ടാക്കുന്ന മാമ്പഴ പുളിശ്ശേരിയുടെ മണം തന്നെ നമ്മെ കൊതിപ്പിക്കും.
ഇഷ്ട വിഭവമാണെങ്കിലും ഇന്നത്തെ തലമുറയിൽ അധികമാർക്കും മാമ്പഴ പുളിശ്ശേരി എങ്ങനെയാണ് ഉണ്ടാക്കുക എന്നത് അറിയില്ല. വളരെ ശ്രമകരമാണെന്ന ചിന്തയിൽ മാമ്പഴ പുളിശ്ശേരി ഉണ്ടാക്കാത്തവരും ഉണ്ട്. എന്നാൽ നല്ല രുചിയേറിയ മാമ്പഴ പുളിശ്ശേരി ഉടൻ തയ്യാറാക്കാം എന്നതാണ് വാസ്തവം.
മാമ്പഴപ്പുളിശ്ശേരിയ്ക്ക് ആവശ്യമായ ചേരുവകൾ
മാമ്പഴം 6 എണ്ണം
പച്ചമുളക് 4 എണ്ണം
മഞ്ഞൾ പൊടി അര ടീസ്പൂൺ
ഉപ്പ് ഒരു സ്പൂൺ
പുളിയില്ലാത്ത തൈര് ഒരു കപ്പ്
ജീരകം ഒരു സ്പൂൺ
ഉലുവ ഒരു സ്പൂൺ
തേങ്ങ ഒരു കപ്പ്
എണ്ണ രണ്ട് സ്പൂൺ
കടുക് ഒരു സ്പൂൺ
വറ്റൽ മുളക് നാലെണ്ണം
മുളക് പൊടി കാൽ സ്പൂൺ
കറിവേപ്പില ആവശ്യത്തിന്
മാമ്പഴം തോലു കളഞ്ഞ് വൃത്തിയാക്കി പാത്രത്തിലേക്ക് വയ്ക്കുക. മാമ്പഴം കഷ്ണങ്ങളാക്കിയോ മുഴുവനായി ഇട്ടോ മാമ്പഴപുളിശ്ശേരി ഉണ്ടാക്കാം. ഇതിലേക്ക് ആവശ്യത്തിന് വെള്ളം , മുളക് പൊടി, ഉപ്പ് , മഞ്ഞൾ പൊടി, എന്നിവ ചേർത്ത് വേവിക്കുക. ഇതിന് ശേഷം പുളിയില്ലാത്ത തൈര് ചേർക്കാം. ഇതിലേക്ക് ജീരകം ചേർത്ത് അരച്ചുവെച്ച തേങ്ങയും ചേർത്ത് ഇളക്കി കുറുക്കിയെടുക്കു.
കറി കുറുകി വരുമ്പോൾ ചീനച്ചട്ടിയിൽ എണ്ണ ഒഴിച്ച് കടുക് പൊട്ടിക്കാം. ഇതിലേക്ക് ഉലുവ, കറുവേപ്പില, വറ്റൽ മുളക് എന്നിവ ചേർത്ത് ഇളക്കി തയ്യാറിയിരിക്കുന്ന മാമ്പഴ പുളിശ്ശേരിയലേക്ക് ചേർക്കുക.
Comments