ഗ്ലാസ്ഗോ: കോമണ്വെല്ത്ത് ഗെയിംസ് ലോണ് ബോള്സ് മത്സരത്തില് ഇന്ത്യന് താരം പുതുല് സോനോവാള് സ്വപ്നതുല്യമായ തുടക്കമാണ് കുറിച്ചത്. പുരുഷന്മാരുടെ സിംഗിള്സില് ലോകോത്തര താരവും കോമണ്വെല്ത്ത് ഗെയിംസിലെ മൂന്ന് തവണ മെഡല് ജേതാവുമായ കാനഡയുടെ റ്യാന് ബെസ്റ്ററെ അട്ടിമറിച്ചാണ് പുതുല് ശ്രദ്ധ നേടിയത്.
സെക്ഷന് ഡിയിലെ ആദ്യ മത്സരത്തില് ടൈബ്രേക്കറിലൂടെയായിരുന്നു ഇന്ത്യന് താരത്തിന്റെ വിജയം. ആദ്യ സെറ്റ് 5-4ന് സ്വന്തമാക്കിയ പുതുല്, രണ്ടാം സെറ്റില് 3-7ന് പിന്നിലായെങ്കിലും നിര്ണായക ടൈബ്രേക്കറില് സമ്മര്ദ്ദം അതിജീവിച്ച് വിജയം ഉറപ്പിക്കുകയായിരുന്നു.
ലോക റാങ്കിങ്ങില് 21-ാം സ്ഥാനത്തുള്ള പുതുല് നിലവിലെ ഏഷ്യന് ചാമ്പ്യനാണ്. രണ്ട് കോമണ്വെല്ത്ത് ഗെയിംസ് വെള്ളിയും ഒരു വെങ്കലവും നേടിയിട്ടുള്ള പരിചയസമ്പന്നനായ ബെസ്റ്ററിനെ തോല്പ്പിച്ചതോടെ ഇന്ത്യന് താരത്തിന്റെ മെഡല് പ്രതീക്ഷകളും ശക്തമായി. പുതുലിന്റെ അടുത്ത എതിരാളി ഫോക്ലന്ഡ് ഐലന്ഡ്സിന്റെ സിസില് അലക്സാണ്ടറാണ്.
അതേസമയം, വനിതകളുടെ പെയര്സ് ഇനത്തിലും ഇന്ത്യയ്ക്ക് വിജയത്തോടെ തുടക്കമായി. രൂപ റാണി ടിര്ക്കിപിങ്കി സഖ്യം ടൈബ്രേക്കറില് മാള്ട്ടയുടെ റെബേക്ക ലൂയിസ്കോണി ലെയ് സഹോദരിമാരെ പരാജയപ്പെടുത്തി അടുത്ത ഘട്ടത്തിലേക്ക് മുന്നേറി.
