തിരുവനന്തപുരം: നീറ്റ് പരീക്ഷാ ക്രമക്കേടുമായി ബന്ധപ്പെട്ട വിഷയത്തില്‍ കോണ്‍ഗ്രസ് ഇരട്ടത്താപ്പാണ് സ്വീകരിക്കുന്നതെന്നും വിദ്യാര്‍ഥികളുടെ പേരില്‍ രാഷ്‌ട്രീയ നാടകം കളിക്കുകയാണെന്നും ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ എംഎല്‍എ ആരോപിച്ചു. വിദ്യാര്‍ഥികളുടെ താല്‍പര്യവും പരീക്ഷാ സംവിധാനത്തിന്റെ വിശ്വാസ്യതയും സംരക്ഷിക്കാന്‍ കേന്ദ്ര സര്‍ക്കാര്‍ പുനഃപരീക്ഷ ഉള്‍പ്പെടെയുള്ള നടപടികള്‍ സ്വീകരിച്ചപ്പോള്‍ കോണ്‍ഗ്രസ് ഉത്തരവാദിത്വപരമായ നിലപാട് സ്വീകരിച്ചില്ലെന്നും അദ്ദേഹം വിമര്‍ശിച്ചു.
തിരുവനന്തപുരത്ത് നടത്തിയ വാര്‍ത്താസമ്മേളനത്തിലാണ് രാജീവ് ചന്ദ്രശേഖര്‍ കോണ്‍ഗ്രസിനെതിരെ രൂക്ഷ വിമര്‍ശനം ഉന്നയിച്ചത്. പരീക്ഷാ ക്രമക്കേട് പുറത്തുവന്നതോടെ കേന്ദ്ര സര്‍ക്കാര്‍ അടിയന്തരമായി ഇടപെട്ട് പുനഃപരീക്ഷ നടത്തുകയും കുറ്റക്കാര്‍ക്കെതിരെ ശക്തമായ നടപടികള്‍ സ്വീകരിക്കുകയും ചെയ്തുവെന്ന് അദ്ദേഹം പറഞ്ഞു. വിദ്യാര്‍ഥികള്‍ സമരത്തിലായിരുന്ന സമയത്ത് കോണ്‍ഗ്രസ് നേതാക്കളായ രാഹുല്‍ ഗാന്ധിയോ പ്രിയങ്ക ഗാന്ധിയോ സമരവേദിയിലെത്തിയില്ലെന്നും, എന്നാല്‍ പാര്‍ലമെന്റ് സമ്മേളനം ആരംഭിക്കുന്നതിന് തൊട്ടുമുമ്പ് വിഷയം രാഷ്‌ട്രീയ ആയുധമാക്കുകയാണെന്നും അദ്ദേഹം ആരോപിച്ചു.
ജമ്മു-കശ്മീര്‍, ഹിമാചല്‍ പ്രദേശ്, കേരളം ഉള്‍പ്പെടെ വിവിധ സംസ്ഥാനങ്ങളില്‍ പരീക്ഷാ ക്രമക്കേടുകള്‍ ഉണ്ടായിട്ടും അവിടങ്ങളിലെ സംഭവങ്ങളില്‍ കോണ്‍ഗ്രസ് സമാനമായ പ്രതിഷേധം നടത്തിയില്ലെന്നും അദ്ദേഹം ചൂണ്ടിക്കാട്ടി. ജനാധിപത്യത്തിന്റെ പ്രധാന വേദിയായ പാര്‍ലമെന്റില്‍ വിഷയം ചര്‍ച്ച ചെയ്യാന്‍ കോണ്‍ഗ്രസ് തയ്യാറാകാത്തത് എന്തുകൊണ്ടാണെന്നും അദ്ദേഹം ചോദിച്ചു. വിദ്യാര്‍ഥികളുടെ താല്‍പര്യത്തിനായുള്ള സമരമാണോ, കോണ്‍ഗ്രസിന്റെ രാഷ്‌ട്രീയ അജണ്ടയ്‌ക്കായുള്ള സമരമാണോ നടക്കുന്നതെന്ന് ജനങ്ങള്‍ വിലയിരുത്തണമെന്നും രാജീവ് ചന്ദ്രശേഖര്‍ പറഞ്ഞു.
ഭരണഘടനയില്‍ സത്യപ്രതിജ്ഞ ചെയ്ത കേരള മുഖ്യമന്ത്രി പ്രധാനമന്ത്രിയുടെ വസതിക്ക് മുന്നില്‍ സമരം നടത്തിയതിന്റെ ഉദ്ദേശ്യവും അദ്ദേഹം ചോദ്യം ചെയ്തു. നീറ്റ് പരീക്ഷയിലെ ക്രമക്കേടുകള്‍ പ്രധാനമന്ത്രി നരേന്ദ്ര മോദി അതീവ ഗൗരവത്തോടെയാണ് കണ്ടതെന്നും കുറ്റക്കാര്‍ക്കെതിരെ കര്‍ശന നടപടി സ്വീകരിക്കാന്‍ കേന്ദ്ര സര്‍ക്കാര്‍ തീരുമാനിച്ചിട്ടുണ്ടെന്നും അദ്ദേഹം വ്യക്തമാക്കി. വിദ്യാര്‍ഥി സമൂഹത്തിന്റെ ആശങ്കകള്‍ ഉത്തരവാദിത്വത്തോടെ പരിഹരിക്കുമെന്നും അദ്ദേഹം കൂട്ടിച്ചേര്‍ത്തു.
കാലിക്കറ്റ് സര്‍വകലാശാല മുന്‍ വൈസ് ചാന്‍സലറും ബിജെപി സംസ്ഥാന വൈസ് പ്രസിഡന്റുമായ ഡോ. എം. അബ്ദുല്‍ സലാം, പി.കെ. കൃഷ്ണദാസ്, അഡ്വ. ജെ.ആര്‍. പദ്മകുമാര്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.
