തങ്ങളുടെ ആദ്യത്തെ കൺമണിയെ കാത്തിരിക്കുകയാണ് താരദമ്പതികളായ ആലിയ ഭട്ടും പ്രിയതമൻ രൺബീർ കപൂറും. ഇപ്പോഴിതാ ആലിയ ഭട്ട് തന്റെ ബേബി ഷവറിന്റെ ചിത്രങ്ങൾ പങ്കുവെച്ചതോടെ അതിയായ സന്തോഷത്തിലാണ് ഇരുവരുടെയും ആരാധകർ.
മഞ്ഞ നിറത്തിലുള്ള സൽവാറിലാണ് ബേബി ഷവറിനായി ആലിയ എത്തിയത്. പീച്ചും വെള്ളയും നിറമുള്ള കുർത്തയാണ് രൺവീറിന്റെ വേഷം. ഇൻസ്റ്റഗ്രാമിൽ തങ്ങളുടെ ആരാധകർക്കായി ആലിയ തന്നെയാണ് ചിത്രങ്ങൾ പങ്കുവെച്ചിരിക്കുന്നത്. മൂന്ന് ചിത്രങ്ങൾ രൺവീറിനൊടൊപ്പവും മറ്റുള്ളവ കുടുംബാംഗങ്ങൾക്കൊപ്പവുമാണ്.
അമ്മ സോണി റസ്ദാൻ, പിതാവ് മഹേഷ് ഭട്ട്, സഹോദരിമാരായ ഷഹീൻ, പൂജ എന്നിവരും ആന്റി ടീനയുമെല്ലാം ചടങ്ങിൽ പങ്കെടുത്തതായി ചിത്രങ്ങളിൽ കാണാം. കൂടാതെ രൺബീറിന്റെ കുടുംബത്തിൽ നിന്ന് അമ്മയും സഹോദരിമാരായ റിദ്ദിമ, കരിഷ്മ കപൂർ, നിതാഷ നന്ദ എന്നിവരുമുണ്ട്. അതിഥികളായി കരൺ ജോഹറും അയൻ മുഖർജിയും എത്തി.
‘ജസ്റ്റ് ലവ്’ എന്ന തലക്കെട്ടോടെയാണ് ബേബി ഷവർ ചിത്രങ്ങൾ ആലിയ പങ്കുവെച്ചത്. മുംബൈയിലെ ഇരുവരുടെയും അപ്പാർട്ട്മെന്റ് ബ്ലോക്കായ വാസ്തുവിൽ വെച്ചായിരുന്നു ചടങ്ങ് നടന്നത്. ഈ വർഷം ഏപ്രിലിലായിരുന്നു പ്രണയജോഡികളായ ആലിയയും രൺബീറും വിവാഹിതരായത്. ഏറ്റവും അടുത്ത സുഹൃത്തുക്കൾക്കും ക്ഷണിക്കപ്പെട്ട ബന്ധുക്കൾക്കും മാത്രമായിരുന്നു ചടങ്ങിലേക്ക് പ്രവേശനം. 2017 മുതലുള്ള ഇരുവരുടെയും പ്രണയമാണ് ഇതോടെ സാഫല്യമായത്. താരദമ്പതികളുടെ ഏറ്റവും ഒടുവിലായി പുറത്തിറങ്ങിയ ചിത്രം ബ്രഹ്മാസ്ത്രയാണ്.
Comments