കൊച്ചി: ഐഎസ്എൽ ഫുട്‌ബോൾ ഒമ്പതാം സീസണിലെ ഉദ്ഘാടന മത്സരത്തിൽ ആവേശകരമായ ജയം സ്വന്തമാക്കി കേരളാ ബ്ലാസ്റ്റേഴ്സ്. കൊൽക്കത്ത വമ്പന്മാരായ ഈസ്റ്റ് ബംഗാളിനെ ഒന്നിനെതിരെ മൂന്ന് ഗോളുകൾക്കാണ് മഞ്ഞപ്പട തകർത്തത്. രണ്ട് വർഷങ്ങൾക്ക് ശേഷം കൊച്ചിയിലേക്ക് തിരിച്ചെത്തിയ ഐഎസ്എല്ലിനെ വരവേൽക്കാൻ ബ്ലാസ്റ്റേഴ്സ് ആരാധകർ കലൂർ ജവഹർലാൽ സ്റ്റേഡിയത്തിലേക്ക് ഒഴുകുകയായിരുന്നു.
ആദ്യ പകുതിയിൽ ഇരു ടീമുകളും ഗോൾ അടിക്കാതെ പിരിഞ്ഞു. എന്നാൽ രണ്ടാം പകുതിയിൽ ഉടനീളം ബ്ലാസ്റ്റേഴ്‌സിന്റെ ആധിപത്യമായിരുന്നു. തുടക്കം മുതൽ ബ്ലാസ്റ്റേഴ്സ് ഈസ്റ്റ് ബംഗാളിന്റെ ഗോൾമുഖത്തേക്ക് ഇരച്ചുകയറി. അതിന്റെ ഫലം എഴുപത്തിയൊന്നാം മിനുട്ടിൽ കണ്ടു. ഹർമൻ ജോത് ഖബ്രയുടെ അളന്നു മുറിച്ച പാസിൽ നിന്ന് ലൂണ ഈസ്റ്റ് ബംഗാൾ പോസ്റ്റിലേക്ക് നിറയൊഴിച്ച് ആദ്യ ഗോൾ നേടി.
ഗോൾ അടിച്ചിട്ടും കൊമ്പന്മാരുടെ ആക്രമണത്തിന്റെ വീര്യം ഒട്ടും കുറഞ്ഞില്ല. പകരക്കാരനായി ഇറങ്ങിയ യുക്രെയ്ൻ താരമായ ഇവാൻ കലുഷ്‌നിയുടെ വകയായിരുന്നു രണ്ടാം ഗോൾ . 82-ാം മിനുട്ടിൽ പെനാൽട്ടി ബോക്‌സിനകത്ത് നടന്ന കൂട്ടപ്പൊരിച്ചിലിനിടയിൽ പന്ത് കിട്ടിയ കല്യുഷ് നിയുടെ ഇടങ്കാലനടി ഈസ്റ്റ് ബംഗാളിന്റെ വല വീണ്ടും കുലുക്കി. കളിയുടെ ഒഴുക്കിന് വിപരീതമായിരുന്നു ഈസ്റ്റ് ബംഗാളിന്റെ ഗോൾ. 87ാം മിനിറ്റിൽ അലക്‌സ് ലിമയിലൂടെ ഈസ്റ്റ് ബംഗാൾ ആശ്വാസ ഗോൾ നേടി.
കോർണർ കിക്കിലൂടെയായിരുന്നു ഗോൾ. സമനില പിടിക്കാമെന്ന് കരുതിയ ഈസ്റ്റ് ബംഗാളിനെ ഞെട്ടിച്ച് തൊട്ടടുത്ത മിനുട്ടിൽ കലൂഷ് നി വീണ്ടും ബ്ലാസ്റ്റേഴ്‌സിന് വേണ്ടി വല കുലുക്കി പട്ടിക പൂർത്തിയാക്കി. ഉദ്ഘാടന മത്സരത്തിൽ തന്നെ മികച്ച വിജയം കരസ്ഥമാക്കിയ ബ്ലാസ്റ്റേഴ്സ് ആരാധകർക്ക് പുതിയ സീസണിൽ നല്ല വിരുന്ന് സമ്മാനിച്ചു. ആദ്യ കളിയിൽ തന്നെ മൂന്ന് പോയിന്റ് കരസ്ഥമാക്കിയ ബ്ലാസ്റ്റേഴ്സ് ഈ സീസണിൽ സ്വപ്‌നതുല്യമായ തുടക്കം ലഭിച്ചു.
