താടി നീട്ടി വളർത്താൻ നമുക്ക് എല്ലാവർക്കും ഇഷ്ടമാണ്. എന്നാൽ താടി നീട്ടി വളർത്തുന്നവരിൽ വളരെ സാധാരണയായി കണ്ടുവരുന്ന ഒന്നാണ് ചൊറിച്ചിൽ. ചൊറിച്ചിൽ സഹിക്കാതെ വന്നാൽ ഇഷ്ടമൊക്കെ മാറ്റി വച്ച് താടി വടിച്ചും പോകും. തുടർച്ചയായി ചൊറിയുന്നത് ആ ഭാഗത്ത് വേദനയുണ്ടാക്കുന്നതിന് പുറമെ തൊലി അടരുന്നതിനും കാരണമാകുന്നു. വൃത്തിക്കുറവ്, വരണ്ട ചർമം, മുഖക്കുരു തുടങ്ങിയവാണ് ചൊറിച്ചിലിനുള്ള പ്രധാനകാരണം. പലരും താടിയിലെ ചൊറിച്ചിലുകൾക്ക് പരിഹാരം തേടി പോകാറുണ്ട്. ചൊറിച്ചിലുകൾ വരാതിരിക്കാൻ പരമ പ്രധാനം വൃത്തിയാണ്.
ഇടയ്ക്കിടയ്ക്ക് മുഖം കഴുകുമ്പോൾ താടി കൂടി നന്നായി കഴുകുക. ഇത് ചൊറിച്ചിൽ കുറയ്ക്കാൻ സഹായിക്കും. സാവധാനം മൃദുവായി സ്പർശിച്ചു വേണം മുഖം കഴുകാൻ. താരൻ തലമുടിയെ മാത്രമല്ല താടിയെയും ബാധിക്കും. താടിയെ താരൻ ബാധിക്കുന്നതോടെ ചൊറിച്ചിൽ ഉണ്ടാകുന്നു. താടി വടിക്കാതെ തന്നെ ഇത് കൈകാര്യം ചെയ്യാൻ വഴികളുണ്ട്. ഷാംപൂ ഉപയോഗിച്ച് ഇടയ്ക്കിടെ താടി കഴുകുന്നത് താരൻ ഇല്ലാതാക്കും.
തെറ്റായ തരത്തിൽ മൂർച്ചയില്ലാത്ത ബ്ലേഡുകൾ ഉപയോഗിച്ച് താടി വടിക്കരുത്. തെറ്റായ ദിശകളിൽ ബ്ലേഡുകൾ ഉപയോഗിച്ച് താടി വടിക്കാൻ ശ്രമിക്കുമ്പോൾ തൊലി ചുളിയുകയും മുഖത്ത് മുറിവുകൾ ഉണ്ടാവുകയും ചെയ്യുന്നു. ഇത് ചൊറിച്ചിലിന് കാരണാകും. മുറിവുകളിൽ ചൊറിയുമ്പോൾ അത് പഴുക്കുന്നു. അതിനാൽ ഷേവിംഗിന് ശുചിത്വവും അണുവിമുക്തവുമായ ഉപകരണങ്ങൾ ഉപയോഗിക്കുക.
താടിയുള്ള പുരുഷന്മാർക്ക് മുഖക്കുരു ഉണ്ടാകാനുള്ള സാധ്യത താടിയില്ലാത്തവരേക്കാൾ കൂടുതലാണ്. മുഖത്തെ രോമങ്ങൾക്ക് എണ്ണ, ബാക്ടീരിയ, നിർജ്ജീവമായ ചർമ്മ കോശങ്ങൾ എന്നിവയെയെല്ലാം തടഞ്ഞു നിർത്താൻ കഴിയും. ഇത് മുഖക്കുരു ഉണ്ടാകാൻ വഴിയൊരുക്കും. മുഖം കഴുകുന്നതും, കറ്റാർ വാഴ പോലുള്ള പ്രകൃതിദത്ത മരുന്നുകൾ ഉപയോഗിക്കുന്നതും ഒരു പരിധിവരെ മുഖ കുരുവിനെ തടയാം. ഇത്തരം കാര്യങ്ങൾ ശ്രദ്ധിച്ചാൽ താടിയിലെ ചൊറിച്ചിൽ കുറയ്ക്കാം. താടിയിലെ ചൊറിച്ചിലിന് ചിലപ്പോൾ പൊടി കൈകൾ ഫലവത്താകണമെന്നില്ല. അത്തരം സാഹചര്യങ്ങളിൽ ഡോക്ടറുടെ സഹായം തേടുക.
