തിരുവനന്തപുരം; റോഡ് സുരക്ഷയ്ക്ക് ഭീഷണിയാകുന്ന തരത്തിൽ രൂപമാറ്റം വരുത്തി നിരത്തിലിറങ്ങുന്ന വാഹനങ്ങളെക്കുറിച്ച് എൻഫോഴ്സ്മെന്റ് ആർടിഒമാരെ അറിയിക്കാൻ സംവിധാനമൊരുക്കി മോട്ടോർവാഹന വകുപ്പ്. 14 ജില്ലകളിലും വാട്സ്ആപ്പ് നമ്പരുകൾ ഏർപ്പെടുത്തിയാണ് വീഡിയോ സഹിതം പൊതുജനങ്ങൾക്ക് പരാതി അറിയിക്കാൻ സംവിധാനമൊരുക്കിയിട്ടുളളത്.
വാഹനങ്ങളിലെ അനധികൃത രൂപ മാറ്റങ്ങളും, റോഡിലെ അഭ്യാസ പ്രകടനങ്ങളും, മത്സരയോട്ടവും റോഡ് സുരക്ഷക്ക് എന്നും ഭീഷണിയാണെന്ന് മോട്ടോർ വാഹന വകുപ്പ് ചൂണ്ടിക്കാട്ടി. അപകട സാധ്യതകളെ ഒഴിവാക്കുന്ന രീതിയിലുള്ള പ്രവർത്തനങ്ങളിൽ ഏർപ്പെടുക എന്നത് ഒരോ പൗരന്റേയും ഉത്തരവാദിത്വമാണെന്നും എംവിഡി ചൂണ്ടിക്കാട്ടുന്നു.
തീവ്ര ശബ്ദവും വെളിച്ചവും ശിശുക്കൾ മുതൽ വയോധികർ വരെയുള്ള പൊതു സമൂഹത്തിന് കനത്ത ആരോഗ്യ ഭീഷണിയും ഉയർത്തുന്നുണ്ട്. മോട്ടോർ വാഹന വകുപ്പിലെ ഉദ്യോഗസ്ഥരുടെ പ്രവർത്തനം കൊണ്ടു മാത്രം ഇത്തരം നിയമ ലംഘനങ്ങൾ പൂർണ്ണമായി തടയാനാവില്ല. ഫോട്ടോ /വീഡിയോകളോടൊപ്പം സ്ഥലം, താലൂക്ക്, ജില്ല എന്നീ വിശദാശംകൾ കൂടി ഉൾപ്പെടുത്തി വേണം വിവരങ്ങൾ കൈമാറാൻ.
റോഡ് സുരക്ഷയ്ക്ക് ഭീഷണിയാകുന്ന രൂപമാറ്റങ്ങൾ, സൈലൻസറുകളും ഹോണുകളും മാറ്റി അതി തീവ്ര ശബ്ദം പുറപ്പെടുവിക്കുക, തീവ്ര പ്രകാശം പുറപ്പെടുവിക്കുന്ന ലൈറ്റുകൾ ഘടിപ്പിക്കുക, പൊതുനിരത്തുകളിൽ അഭ്യാസം പ്രകടനം/ മത്സരയോട്ടം
നടത്തുക, അമിത വേഗതയിലും അപകടകരമായും വാഹനമോടിക്കുക തുടങ്ങിയ കുറ്റങ്ങൾ ചെയ്യുന്ന വാഹനങ്ങളെയും ഡ്രൈവർമാരെയും പറ്റിയുള്ള വിവരങ്ങളും ഫോട്ടോകളും ചെറിയ വീഡിയോകൾ സഹിതം അറിയിക്കാം. വിവരങ്ങൾ നൽകുന്നവരുടെ പേരു വിവരങ്ങൾ രഹസ്യമായി സൂക്ഷിക്കുമെന്നും മോട്ടോർവാഹന വകുപ്പ് ഉറപ്പ് നൽകുന്നു.
വിവരങ്ങൾ വാട്സ് അപ്പിൽ അറിയിക്കേണ്ട മൊബൈൽ നമ്പരുകൾ
1. തിരുവനന്തപുരം – 9188961001
2. കൊല്ലം – 9188961002
3. പത്തനംതിട്ട – 9188961003
4. ആലപ്പുഴ – 9188961004
5. കോട്ടയം – 9188961005
6.ഇടുക്കി – 9188961006
7. എറണാകുളം – 9188961007
8. തൃശൂർ – 9188961008
9. പാലക്കാട് – 9188961009
10. മലപ്പുറം – 9188961010
11. കോഴിക്കോട് – 9188961011
12. വയനാട് – 9188961012
13. കണ്ണൂർ – 9188961013
14. കാസർകോട് – 9188961014
