ദേശീയ ഗെയിംസ്; യോഗയിൽ ആദ്യ സ്വർണം നേടി പൂജ പട്ടേൽ; ചരിത്രനേട്ടം കൈവരിച്ചത് ഗുജറാത്ത് സ്വദേശി

ന്യൂഡൽഹി : ദേശീയ ഗെയിംസിൽ ചരിത്ര നേട്ടവുമായി പൂജ പട്ടേൽ. ദേശീയ ഗെയിംസിലെ യോഗാസന വിഭാഗത്തിൽ സ്വർണം നേടിക്കൊണ്ടാണ് ഗുജറാത്ത് സ്വദേശിയായ പൂജ ചരിത്രം കുറിച്ചത്. ഇതോടെ യോഗയിൽ സ്വർണമെഡൽ നേടുന്ന ആദ്യ അത്‌ലറ്റ് എന്ന പട്ടമാണ് പൂജ സ്വന്തമാക്കിയത്.

ദേശീയ ഗെയിംസിൽ ഉൾപ്പെടുത്തിയ അഞ്ച് പുതിയ കായിക ഇനങ്ങളിൽ ഒന്നാണ് യോഗ. കബഡി, ഖോ ഖോ, മല്ലഖംബ തുടങ്ങിയ കായിക ഇനങ്ങളും ഉൾപ്പെടുന്ന പരമ്പരാഗത വിഭാഗത്തിലാണ് യോഗ ഉൾപ്പെടുത്തിയിരുന്നത്. മത്സരത്തിൽ മികച്ച പ്രകടനം കാഴ്ചവെച്ചാണ് പൂജ ചരിത്രപുസ്തകങ്ങളിൽ തന്റെ പേര് എഴുതിച്ചേർത്തത്.

Pooja Patel (Gujarat) wins Gold🥇 in Yogasana in Traditional category in #36thNationalGames 2022, being held in Gujarat.#NationalGames2022 | #NationalGames pic.twitter.com/IsxiR7B6My

— All India Radio News (@airnewsalerts) October 9, 2022

മത്സരത്തിൽ യോഗ ചെയ്യുന്ന പൂജയുടെ വീഡിയോ ഓൾ ഇന്ത്യ റേഡിയോ ന്യൂസിന്റെ ഔദ്യോഗിക ട്വിറ്ററിൽ പങ്കുവെച്ചിട്ടുണ്ട്.

36-ാമത് ദേശീയ ഗെയിംസ് ഗുജറാത്തിൽ വെച്ചാണ് നടക്കുന്നത്. സെപ്റ്റംബർ 29 ന് ആരംഭിച്ച മത്സരം ഈ മാസം 12 ന് അവസാനിക്കും. അഹമ്മദാബാദ്, ഗാന്ധിനഗർ, സൂറത്ത്, വഡോദര, രാജ്കോട്ട്, ഭാവ്നഗർ എന്നിവിടങ്ങളിൽ വെച്ചാണ് പരിപാടി.