തിരുവനന്തപുരം: എം എൽ എ എൽദോസ് കുന്നപ്പള്ളിക്കെതിരെയുള്ള പരാതിയിൽ യുവതി ഇന്ന് കോവളം പോലീസ് സ്റ്റേഷനിൽ ഹാജരാകും. എം എൽ എ കൈയ്യേറ്റം ചെയ്തെന്ന് എറണാകുളം സ്വദേശിയായ യുവതിയാണ് കോവളം പോലീസിൽ പരാതി നൽകിയിട്ടുള്ളത്.തിരുവനന്തപുരത്തെ ഒരു സ്കൂളിലെ അദ്ധ്യാപികയാണ് പരാതിക്കാരി.
യുവതിയെ കാണാനില്ലെന്ന് കാട്ടി കഴിഞ്ഞ ദിവസം വഞ്ചിയൂർ പോലീസിനും പരാതി ലഭിച്ചിരുന്നു. ഈ പരാതിയിൽ യുവതിയിൽ നിന്ന് വഞ്ചിയൂർ പോലീസ് മൊഴി രേഖപ്പെടുത്തി. എം എൽ എയുടെ വാഹനത്തിൽ കോവളത്ത് എത്തിയെന്നും സ്ഥലത്തു വച്ച് എം എൽ എ മർദ്ദിച്ചെന്നും യുവതി പരാതിയിൽ ആരോപിക്കുന്നു. കോവളം സൂയിസൈഡ് പോയിന്റിന് സമീപത്ത് വെച്ചാണ് മർദ്ദിച്ചത്.
ഒരുമിച്ച് യാത്ര ചെയ്യുന്നതിനിടെ വാക്കേറ്റത്തെ തുടർന്ന് എംഎൽഎ മർദ്ദിച്ചെന്നാണ് പരാതി. എൽദോസിന്റെ ഡ്രൈവറും മറ്റൊരു സ്റ്റാഫും വാഹനത്തിൽ ഒപ്പമുണ്ടായിരുന്നു. ദീർഘകാലമായി എംഎൽഎയെ പരിചയമുണ്ടെന്നും കഴിഞ്ഞ മാസം 14നാണ് സംഭവമെന്നും പരാതിയിൽ വ്യക്തമാക്കിയിട്ടുണ്ട്. 28 നാണ് സിറ്റി പോലീസ് കമ്മീഷണർക്ക് പരാതി നൽകിയത്.
അതേസമയം സംഭവത്തെ കുറിച്ച് തനിക്കൊന്നും അറിയില്ലെന്നും പരാതി പോലീസ് പരിശോധിക്കട്ടെയെന്നുമാണ് എൽദോസ് കുന്നപ്പള്ളി എംഎൽഎ പ്രതികരിച്ചത്.
