മുംബൈ: മഹാരാഷ്‌ട്ര മുഖ്യമന്ത്രി ഏകനാഥ് ഷിൻഡെ നയിക്കുന്ന ശിവസേന വിഭാഗത്തിന് രണ്ട് വാളുകളും പരിചയും ചിഹ്നമായി അനുവദിച്ച് കേന്ദ്ര തിരഞ്ഞെടുപ്പ് കമ്മീഷൻ. ഷിൻഡെ പക്ഷത്തിന് ബാലാസാഹബ് ശിവസേന എന്ന പേര് നേരത്തേ തിരഞ്ഞെടുപ്പ് കമ്മീഷൻ അനുവദിച്ചിരുന്നു.
2004ൽ സംസ്ഥാന പാർട്ടി അംഗീകാരം നഷ്ടമായ പീപ്പിൾസ് ഡെമോക്രാറ്റിക് മൂവ്മെന്റ് ഉപയോഗിച്ചിരുന്ന ചിഹ്നമാണ് വാളും പരിചയും. പാർട്ടിക്ക് അംഗീകാരം നഷ്ടമായതോടെ, സൗജന്യ ചിഹ്നമായി പരിഗണിച്ച് തിരഞ്ഞെടുപ്പ് കമ്മീഷൻ ഇത് ഏകനാഥ് ഷിൻഡെ പക്ഷത്തിന് നൽകുകയായിരുന്നു.
ഉദ്ധവ് താക്കറെ പക്ഷത്തിന്, ശിവസേന ഉദ്ധവ് ബാലാസാഹബ് താക്കറെ എന്ന പേരും ചിഹ്നമായി ദീപശിഖയും കഴിഞ്ഞ ദിവസം തിരഞ്ഞെടുപ്പ് കമ്മീഷൻ അനുവദിച്ചിരുന്നു. ഇരുവിഭാഗങ്ങളും അവകാശവാദം ഉന്നയിച്ചതോടെ, ശിവസേനയുടെ തനത് ചിഹ്നമായ അമ്പും വില്ലും തിരഞ്ഞെടുപ്പ് കമ്മീഷൻ താത്കാലികമായി മരവിപ്പിച്ചിരിക്കുകയാണ്. ആരാണ് യഥാർത്ഥ ശിവസേന എന്നത് നിർണ്ണയിച്ച ശേഷം, ചിഹ്നത്തിന്റെ കാര്യത്തിലും തിരഞ്ഞെടുപ്പ് കമ്മീഷൻ തീരുമാനം എടുക്കും എന്നാണ് വിവരം.
