മരത്തവളകൾ കറുത്ത നിറമായി മാറുന്നതിന് പിന്നിലെ കാരണം കണ്ടെത്തി ഗവേഷകർ. ചെർണോബിൽ ആണവ ദുരന്തം സംഭവം മേഖലയിലാണ് ഗവേഷകർ ഈ പഠനം നടത്തിയത്. ആണവദുരന്തത്തിന്റെ ബാക്കിയായി റേഡിയോ ആക്ടീവ് വികിരണങ്ങൾ അന്തരീക്ഷത്തിൽ വലിയ തോതിൽ ലയിച്ചിരുന്നു. ഇതിന്റെ അനന്തരഫലങ്ങൾ ഇപ്പോഴും മനുഷ്യനും ജന്തുജീവജാലങ്ങളും പ്രകൃതിയും ഒരു പോലെ തന്നെ അനുഭവിക്കുന്നുണ്ട്. ഇതിന്റെ തുടർച്ചയായിട്ടാണ് ശാസ്ത്രജ്ഞർ പരീക്ഷണം നടത്തിയത്. ചെർണോബിലിൽ കാണപ്പെടുന്ന ഏതെങ്കിലും ജീവികൾ ഈ റേഡിയേഷനുമായി പൊരുത്തപ്പെടാൻ തുടങ്ങിയോ എന്നായിരുന്നു ശാസ്ത്രജ്ഞർ പഠനം.
ഈ മേഖലയിൽ കണ്ടുവരുന്ന മരത്തവളകളിൽ പൊരുത്തപ്പെടലിന്റെ ലക്ഷണങ്ങൾ കണ്ടു തുടങ്ങിയെന്നാണ് ഗവേഷകർ പറയുന്നത്. 2016ലാണ് ഇത് സംബന്ധിച്ചുള്ള പഠനം ആരംഭിച്ചത്. ചെർണോബിലിൽ ഉയർന്ന റേഡിയേഷൻ ഉള്ള പ്രദേശങ്ങളിലെ മരത്തവളകൾക്ക് അസാധാരണമായ ഇരുണ്ട നിറം ഗവേഷകർ കണ്ടെത്തി. സാധാരണ മരത്തവളകളുടേതിൽ നിന്ന് വ്യത്യസ്തമായി ഇവയുടെ നിറത്തിൽ വലിയ മാറ്റമാണ് കണ്ടെത്തിയത്.
മനുഷ്യരിലും ജീവികളിലും ഇരുണ്ട നിറത്തിന് കാരണമായ ഇരുണ്ട പിഗ്മെന്റായ മെലാനിൻ ആണ് തവളകളുടെ നിറം മാറ്റത്തിനും കാരണമായത്. അൽട്രാവയലറ്റ് വികിരണത്തിന്റേയും അയൊണൈസിംഗ് വികിരണത്തിന്റേയും ഫലങ്ങൾ കുറയ്ക്കാൻ മെലാനിന് സാധിക്കും. ഇവ ആണവോർജ്ജം ആഗിരണം ചെയ്യുകയും പിന്നീട് പുറന്തള്ളുകയും ചെയ്യുന്നു. മെലാനിന് അയൊണൈസ്ഡ് തന്മാത്രകളെ ശേഖരിക്കാനും നിർവീര്യമാക്കാനും സാധിക്കും. അതുകൊണ്ട് തന്നെ റേഡിയേഷൻ ബാധിച്ച ജീവിക്ക് കോശനാശം സംഭവിക്കാനുള്ള സാധ്യതയും കുറവാണ്. ഇതാണ് അതിജീവനത്തിനുള്ള സാധ്യത വർദ്ധിപ്പിക്കുന്നത്.
യുക്രെയ്ൻ-റഷ്യ സാഹചര്യത്തിൽ നിലവിൽ ഇവിടുത്തെ പഠനങ്ങൾ നിർത്തി വച്ചിരിക്കുകയാണ്. വൈകാതെ തന്നെ ഇത് തുടരുമെന്നും ശാസ്ത്രജ്ഞർ പറയുന്നു.
