നമ്മുടെ ഇടയിലുള്ള പലരും അനുഭവിക്കുന്ന വലിയൊരു പ്രശ്നമാണ് വായ്നാറ്റം. എത്ര അണിഞ്ഞൊരുങ്ങി നടന്നാലും വായ്നാറ്റമുണ്ടെങ്കിൽ പിന്നെ പറഞ്ഞിട്ട് ഒരു കാര്യവുമില്ല. മനുഷ്യന്റെ ആത്മവിശ്വാസം നിസാരമായി തകർക്കാൻ വായ്നാറ്റത്തിനാകും. ഭക്ഷണശീലം മാത്രമല്ല വായ്നാറ്റത്തിന് കാരണമാകുന്നത്. ശുചിത്വവും വായ്നാറ്റവും തമ്മിലും വളരെ അധികം ബന്ധമുണ്ട്. വായ്നാറ്റത്തിന്റെ കാരണം ഓരോരുത്തരിലും വ്യത്യസ്തമായിരിക്കും.
ഭക്ഷണത്തിന് ശേഷം വായ വൃത്തിയാക്കിയില്ലെങ്കിൽ വായ്നാറ്റം ഉണ്ടാകാം. ഭക്ഷണത്തിന്റെ അവശിഷ്ടങ്ങൾ വായിൽ ഇരുന്ന് അണുബാധ ഉണ്ടാവുകയും, ഇത് വായ്നാറ്റത്തിന് കാരണമാവുകയും ചെയ്യുന്നു. വെള്ളം കുടിക്കുന്നത് കുറവാണെങ്കിൽ വായ്നാറ്റം ഉണ്ടാകാം. പുകവലി മറ്റൊരു കാരണമാണ്. ഉള്ളി, വെളുത്തുള്ളി എന്നിവയുടെ അമിത ഉപയോഗവും വായ്നാറ്റം ഉണ്ടാകും.
* വായ്നാറ്റം അകറ്റാൻ ധാരാളം മാർഗങ്ങൾ ഡോക്ടർമാർ ഉൾപ്പെടെ നിർദ്ദേശിക്കാറുണ്ട്. ഇതിലൊന്ന് ദിവസവും നന്നായി വെള്ളം കുടിക്കുക എന്നതാണ്. ദിവസവും നന്നായി വെള്ളം കുടിക്കുന്നത് ചർമ്മത്തിനും വളരെ നല്ലതാണ്.
* വായ്നാറ്റം അകറ്റുന്നതിനുള്ള മറ്റൊരു പ്രതിവിധിയാണ് വെള്ളരിക്ക. വട്ടത്തിൽ മുറിച്ച വെള്ളരിക്കാ കഷണം അണ്ണാക്കിലേക്ക് നാവുകൊണ്ട് അര മിനിട്ട് നേരം ചേർത്ത് വച്ചാൽ വായ്നാറ്റത്തിന് കാരണമാകുന്ന ബാക്ടീരിയകളെ ഇതിലുള്ള രാസപദാർത്ഥം നശിപ്പിക്കുന്നു. വെള്ളരിക്കയിൽ 95 ശതമാനവും വെള്ളമാണ്. ഇത് ശരീരത്തെ ഹൈഡ്രേറ്റ് ചെയ്യാനും വിഷാംശം പുറന്തള്ളാനും സഹായിക്കും.
* പെരുംജീരകം ഉമിനീരിന്റെ ഉത്പാദനം ഉയർത്തി വായ്നാറ്റത്തിന് കാരണമാകുന്ന അണുക്കളെ പ്രതിരോധിക്കും. പേരകത്തിന്റെ ഇല, കറിവേപ്പില, പുതിന ഇല, തുളസിയില, ഗ്രാമ്പൂ തുടങ്ങിയവ വായിലിട്ട് ചവയ്ക്കുന്നത് വായ്നാറ്റത്തെ കുറയ്ക്കും. വായിൽ ഇതിന്റെ സുഗന്ധം തങ്ങി നിൽക്കുകയും ചെയ്യും.
* എല്ലാ ദിവസവും രണ്ട് നേരം പല്ല് തേക്കുകയും, നാക്ക് വടിക്കുകയും ചെയ്യുക
* തേനും കറുവപ്പട്ടയും പല്ലിലും മോണയിലും പുരട്ടുന്നത് വായ്നാറ്റം കുറയ്ക്കാനും പല്ലിലുണ്ടാകുന്ന അസുഖങ്ങൾ കുറയ്ക്കാനും നല്ലതാണ്.
* ഉലുവ ഇട്ട് തിളപ്പിച്ച വെള്ളം കുടിയ്ക്കുന്നത് വായ്നാറ്റം ഒഴിവാക്കാൻ സഹായിക്കും.
* പതിവായി ഉപ്പ് വെള്ളം ഉപയോഗിച്ച് വായ കഴുകുന്നതും നല്ലതാണ്.
