വിവാഹ എല്ലാവർക്കും വളരെ പ്രധാനമായിരിക്കും. അതുകൊണ്ട് തന്നെ ആ ദിവസം വ്യത്യസ്തരായി കാണപ്പെടാനും നാം ആഗ്രഹിക്കും. ഈ ഒരു ദിവസത്തിനായി മാസങ്ങൾ നീണ്ട ഡയറ്റും വർക്ക് ഔട്ടും മേക്കപ്പ് റുട്ടീനുമൊക്കെ പരീക്ഷിക്കുന്നവരാണ് ഏറിയ പങ്കും. ഇത്തരത്തിലുള്ള പരിശ്രമങ്ങൾ കൂടി അത് സാഹസികതയിലേക്ക് പോകാനും സാധ്യതയുണ്ട്.
അത്തരത്തിൽ വിവാഹ ദിവസം ലുക്ക് കിട്ടാൻ ചെവി സൂപ്പർ ഗ്ലൂ വെച്ച് ഒട്ടിച്ച വധുവാണ് ഇപ്പോൾ സമൂഹമാദ്ധ്യമങ്ങളിലെ താരം. ബ്രസീലുകാരിയായ ലോറെന മെൻഡെസ് എന്ന വധുവാണ് ഈ അറ്റകൈ പ്രയോഗം നടത്തിയത്. പ്രശസ്ത മേക്കപ്പ് ആർട്ടിസ്റ്റ് ആയ മി മാർട്ടിൻസ് ആണ് ഇക്കാര്യം തുറന്നുപറഞ്ഞത്.
മുടി ഉയർത്തിക്കെട്ടിയ രീതിയിലുള്ള ഹെയർ സ്‌റ്റൈലാണ് വിവാഹത്തിന് വധു ആവശ്യപ്പെട്ടത്. മുടി കെട്ടിയതോടെ ചെവി പുറത്തേക്ക് തള്ളി നിൽക്കുന്നതായി തോന്നി. അത് മറയ്‌ക്കാൻ എന്തെങ്കിലും ചെയ്യണമെന്ന് ആവശ്യപ്പെട്ടു. ഹെയർ സ്റ്റൈലിൽ മാറ്റം വരുത്തരുതെന്നും നിർബന്ധം പിടിച്ചു. ഇതോടെയാണ് സൂപ്പർ ഗ്ലൂ എന്ന ആശയം മുന്നോട്ട് വെച്ചത്. എന്നാൽ വധു അതിന് അപ്പോൾ തന്നെ സമ്മതിക്കുകയായിരുന്നുവെന്നും സ്റ്റൈലിസ്റ്റ് പറഞ്ഞു. ശേഷം സൂപ്പർ ഗ്ലൂ ചെവിയ്‌ക്ക് പുറകിൽ തേച്ച് തലയോട് ചേർത്ത് വെയ്‌ക്കുകയായിരുന്നു. രണ്ട് വർഷത്തോളമായി ഇവരിത് ചെയ്യുന്നുണ്ടെന്നാണ് വിവരം.
എന്തായാലും വിവാഹ ദിവസം പുതിയ ലുക്ക് കിട്ടിയെങ്കിലും സമൂഹമാദ്ധ്യമങ്ങളിലൂടെ ഇവരെ രൂക്ഷമായി വിമർശിച്ചുകൊണ്ടാണ് ആളുകൾ എത്തുന്നത്. എന്ത് തന്നെ തരാമെന്ന് പറഞ്ഞാലും തങ്ങൾ ഇത്തരത്തിലൊരു കാര്യം ചെയ്യില്ലെന്ന് ചിലർ പ്രതികരിക്കുന്നുണ്ട്. സ്വന്തം ശരീരത്തിലെ കുറവുകൾ ഇഷ്ടപ്പെടാനാണ് ആദ്യം പഠിക്കേണ്ടത് എന്നും ചില ആളുകൾ പറയുന്നു. വധുവിന്റെ വിവിധ ദൃശ്യങ്ങളും ഇതിനോടകം വൈറലായിരിക്കുകയാണ്.
