ഡൽഹി: ഇന്ത്യ അതിവേഗം വളരുന്ന സമ്പദ്വ്യവസ്ഥയാണെന്ന് കേന്ദ്രമന്ത്രി പിയൂഷ് ഗോയൽ. ലോകത്തെ ഏറ്റവും വേഗത്തിൽ വളരുന്ന വലിയ സമ്പദ്വ്യവസ്ഥയിലേക്ക് രാജ്യത്തെ നയിച്ചതിന് നരേന്ദ്രമോദിയുടെ നേതൃത്വത്തിലുള്ള കേന്ദ്ര സർക്കാരിനെ അഭിനന്ദിക്കേണ്ടതുണ്ട്. ഇന്ത്യയെ വിശ്വഗുരുവായി മാറ്റുന്നതിന് രാജ്യത്തെ എല്ലാ പൗരന്മാരും ഒരുമിച്ച് നിൽക്കണമെന്നും പിയൂഷ് ഗോയൽ അഭ്യർത്ഥിച്ചു.
2014-ൽ മോദി സർക്കാർ അധികാരത്തിൽ വന്നപ്പോൾ ഉണ്ടായിരുന്ന സാഹചര്യം ഓർത്തു നോക്കണം. വലിയ വെല്ലുവിളികൾ നേരിട്ടിരുന്ന ദുർബലമായ സമ്പദ്വ്യവസ്ഥയെ അതിവേഗം വളരുന്ന ലോകത്തെ പ്രധാന സമ്പദ്വ്യവസ്ഥയായി ഉയർത്തുന്നതിന് സർക്കാർ കഠിനമായി പരിശ്രമിച്ചു. ഇന്ത്യ ഉയർന്നു വരികയാണ്. സമൃദ്ധി നിറഞ്ഞതും മഹത്തായതും മഹാശക്തിയായും ഇന്ത്യയെ മാറ്റിയെടുക്കാൻ ഓരോ പൗരന്മാരും പ്രതിജ്ഞാബദ്ധരാകണമെന്നും അദ്ദേഹം പറഞ്ഞു.
വരുന്ന 25 വർഷം ഇന്ത്യയുടെ വളർച്ചയുടെ നിർണ്ണായക കാലഘട്ടമായിരിക്കും. ആ സുവർണ്ണകാലം മുന്നിൽ കണ്ടുകൊണ്ട് 135 കോടി ഇന്ത്യക്കാരും ഒരുമിച്ച് രാജ്യത്തിന് വേണ്ടി കർത്തവ്യപൂർവ്വം പ്രവർത്തിക്കണം. നമ്മൾ ഒരുമിച്ച് ഒരു രാജ്യം നിർമ്മിക്കേണ്ടത് കാലഘട്ടത്തിന്റെ ആവശ്യമാണ്.ലോക നേതാവായി ഇന്ത്യയെ പുനഃനിർമ്മിക്കണം. 2047-ഓടെ ഇന്ത്യ 30 ട്രില്യൺ ഡോളർ സമ്പദ്വ്യവസ്ഥയായി മാറുമെന്നും അത് ഓരോ ഇന്ത്യൻ പൗരന്റെയും പ്രതിശീർഷ വരുമാനം 20,000 ഡോളറായി മാറുമെന്നും പിയൂഷ് ഗോയൽ വ്യക്തമാക്കി.
Comments