തിരുവനന്തപുരം : സർവ്വകലാശാലകളിൽ ഒഴിവു വരുന്ന വിസിമാരുടെ താൽക്കാലിക ചുമതല നൽകാൻ പ്രൊഫസർമാരുടെ പട്ടിക ആവശ്യപ്പെട്ട് ഗവർണർ ആരിഫ് മുഹമ്മദ് ഖാൻ. 10 വർഷം സർവ്വീസ് പൂർത്തിയാക്കിയ പ്രൊഫസർമാരുടെ പട്ടികയാണ് ഗവർണർ ആവശ്യപ്പെട്ടിരിക്കുന്നത്. കേരള, കാലിക്കറ്റ്, എംജി, കണ്ണൂർ, കുസാറ്റ് വിസി മാർക്ക് ഇത്് സംബന്ധിച്ച കത്ത് ഗവർണർ അയച്ചു. ഉടനടി പട്ടിക നൽകണമെന്ന് രാജ് ഭവൻ ആവശ്യപ്പെട്ടിട്ടുണ്ട്.
ഒക്ടോബർ 24ന് കേരള സർവ്വകലാശാല വൈസ് ചാൻസലറുടെ കാലാവധി അവസാനിക്കും. വിസി യുടെ താൽക്കാലിക ചുമതല സാധാരണ മറ്റു സർവ്വകലാശാലകളിലെ വിസി മാർക്കാണ് നൽകുക. കാർഷിക സർവ്വകലാശാല വിസിയുടെ താൽക്കാലിക ചുമതല സർക്കാർ നിർദേശ പ്രകാരം അഗ്രികൾച്ചർ പ്രൊഡക്ഷൻ കമ്മീഷണർക്കാണ് നൽകിയത്. വിസിയുടെ താൽക്കാലിക ചുമതല സർക്കാരുമായി ആലോചിച്ച് നൽകണമെന്ന് കാർഷിക സർവ്വകലാശാല നിയമത്തിൽ വ്യവസ്ഥയുണ്ട്. എന്നാൽ മറ്റു സർവ്വകലാശാലകളിൽ ഗവർണർക്ക് സ്വതന്ത്രമായ തീരുമാനം കൈക്കൊള്ളാൻ കഴിയും.മുൻകാലങ്ങളിൽ സർക്കാരുമായി ഗവർണർ കൂടിയാലോചിക്കാറുണ്ടായിരുന്നു എങ്കിലും ഇന്നത്തെ പ്രത്യേക സാഹചര്യത്തിൽ ഗവർണർ സ്വന്തം നിലയിലായിരിക്കും താൽക്കാലിക വിസി യെ നിയമിക്കുക.
സർവ്വകലാശാലയിലെ തന്നെ ഒരു പ്രൊഫസർക്കു വിസി യുടെ ചുമതല നൽകുന്നതിനാണ് പട്ടിക അടിയന്തിരമായി ആവശ്യപ്പെട്ടിരിക്കുന്നത്.യുജിസി നിയമപ്രകാരം വിസി യായി നിയമിക്കപെടുന്നതിന് പത്തു വർഷത്തെ പ്രൊഫസർ സേവനം നിർബന്ധമാണ്.
