ചെന്നൈ: വാടക ഗർഭധാരണവുമായി ബന്ധപ്പെട്ട വിവാദങ്ങൾക്കിടെ വൈകാരിക സമൂഹമാദ്ധ്യമ പോസ്റ്റ് പങ്കുവെച്ച് സംവിധായകനും പ്രമുഖ തെന്നിന്ത്യൻ താരം നയൻതാരയുടെ ഭർത്താവുമായ വിഘ്നേഷ് ശിവൻ. നിലവിലെ വിഷമഘട്ടങ്ങളിൽ മനസ്സ് പതറരുതെന്നും നല്ലകാലം വരുന്നുണ്ടെന്നും സൂചിപ്പിച്ചുകൊണ്ടുള്ള പോസ്റ്റാണ് അദ്ദേഹം പങ്കുവെച്ചത്. ഇൻസ്റ്റഗ്രാമിലൂടെയാണ് താരത്തിന്റെ പ്രതികരണം.
ഇൻസ്റ്റഗ്രാം സ്റ്റോറിയിലാണ് അദ്ദേഹം പ്രത്യാശ പകരുന്ന പോസ്റ്റ് പങ്കുവെച്ചത്.
‘വിഷമഘട്ടത്തിലൂടെ കടന്നു പോകാൻ അസാമാന്യമായ ധൈര്യം ആവശ്യമാണ്. ഒരിക്കലും നിരാശനാകരുത്. നല്ല കാര്യങ്ങൾ നിങ്ങളുടെ പാതയിൽ വന്നുകൊണ്ടിരിക്കുന്നുണ്ട്’- ഇതായിരുന്നു വിഘ്നേഷ് ശിവന്റെ പോസ്റ്റ്. ഇതിന് പിന്നാലെ നിരവധി പേർ അദ്ദേഹത്തെ ആശ്വസിപ്പിച്ചു.
ഈ മാസം ഒൻപതിനാണ് ഇരട്ടക്കുട്ടികൾ പിറന്ന വിവരം താരങ്ങൾ ഇൻസ്റ്റഗ്രാമിലൂടെ അറിയിച്ചത്. ഇതിന് പിന്നാലെ വിവാഹം കഴിഞ്ഞ് നാല് മാസത്തിനുള്ളിൽ എങ്ങനെ കുഞ്ഞുങ്ങൾ ജനിച്ചെന്ന് അതിശയം പ്രകടിപ്പിച്ചിരുന്നു. ഇതോടെയാണ് വാടക ഗർഭ ധാരണത്തിലൂടെയാണ് കുഞ്ഞുങ്ങൾ ഉണ്ടായത് എന്ന വിവരം വ്യക്തമാക്കിയത്. ഇതോടെ ഇരുവർക്കുമെതിരെ രൂക്ഷ വിമർശനവുമായി നിരവധി പേർ രംഗത്ത് എത്തുകയായിരുന്നു.
സംഭവത്തിൽ തമിഴ്നാട് ആരോഗ്യവകുപ്പ് ഇടപെട്ട് താര ദമ്പതികളിൽ നിന്നും വിശദീകരണം ആരാഞ്ഞിരുന്നു. ആറ് വർഷങ്ങൾക്ക് മുൻപ് വിവാഹം രജിസ്റ്റർ ചെയ്തെന്നും, കഴിഞ്ഞ ഡിസംബർ മുതൽ വാടക ഗർഭധാരണവുമായി ബന്ധപ്പെട്ട നടപടികൾ ആരംഭിച്ചെന്നുമായിരുന്നു ഇരുവരും സർക്കാരിന് നൽകിയ മറുപടി. ഇതോടെ താരദമ്പതികളുടെ വിവാഹം വീണ്ടും സജീവ ചർച്ചയാകുകയായിരുന്നു.
