ഡെറാഡൂൺ: ഉത്തരാഖണ്ഡിൽ കേദാർനാഥിലേക്ക് തീർത്ഥാടകരുമായി പോയ ഹെലികോപ്റ്റർ തകർന്നു. ഉച്ചയോടെയായിരുന്നു സംഭവം. ആറ് പേരാണ് ഹെലികോപ്റ്ററിൽ ഉണ്ടായിരുന്നത്. പ്രദേശത്ത് രക്ഷാ പ്രവർത്തനം ആരംഭിച്ചു. രണ്ട് പൈലറ്റുമാർ ഉൾപ്പെടെ ആറ് പേരും മരിച്ചെന്നാണ് റിപ്പോർട്ടുകൾ.
ഫാട്ടയിലെത്തിയപ്പോഴായിരുന്നു അപകടം. തീർത്ഥാടകരുമായി പറന്നുയർന്നതിന് പിന്നാലെ ഹെലികോപ്റ്ററിന് തീ പിടിക്കുകയായിരുന്നുവെന്നാണ് പ്രാഥമിക നിഗമനം. പ്രദേശത്ത് പോലീസും ദുരന്ത നിവാരണ സേനയും എത്തിയിട്ടുണ്ട്. മൃതദേഹങ്ങൾ കണ്ടെടുക്കാനുള്ള ശ്രമത്തിലാണ് ഇവർ.
കേദാർനാഥിലുണ്ടായ ഹെലികോപ്റ്റർ അപകടം അപ്രതീക്ഷിതവും ഞെട്ടൽ ഉളവാക്കുന്നതുമാണെന്ന് കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യ ട്വീറ്റ് ചെയ്തു. സംഭവത്തെക്കുറിച്ചുള്ള കൂടുതൽ വിശദാംശങ്ങൾക്കായി സംസ്ഥാന സർക്കാരുമായി ബന്ധപ്പെട്ട് വരികയാണെന്നും അദ്ദേഹം പറഞ്ഞു.
