തിരുവനന്തപുരം: ആസാദ് കശ്മീർ പരാമർശത്തിൽ കെ.ടി ജലീൽ എംഎൽഎയ്‌ക്കെതിരായ പരാതി സംസ്ഥാന പോലീസ് മേധാവിയ്ക്ക് കൈമാറി ഡൽഹി പോലീസ് . കേസുമായി ബന്ധപ്പെട്ട തുടർ നടപടികൾക്ക് വേണ്ടിയാണ് പരാതി കൈമാറിയത്. നിലവിൽ സൈബർ ക്രൈം പോലീസാണ് കേസ് അന്വേഷിക്കുന്നത്.
ഡൽഹി ഹൈക്കോടതി അഭിഭാഷകൻ ജി എസ് മണി നൽകിയ പരാതിയിലാണ് ജലീൽ നിലവിൽ നിയമ നടപടികൾ നേരിടുന്നത്. സംഭവവുമായി ബന്ധപ്പെട്ട് ഡൽഹി റോസ് അവന്യൂ കോടതിയിൽ സൈബർ ക്രൈം വിഭാഗം റിപ്പോർട്ട് സമർപ്പിച്ചിരുന്നു. ഇതിലാണ് പരാതി കേരള പോലീസ് മേധാവിയ്ക്ക് കൈമാറിയതായി വ്യക്തമാക്കുന്നത്. കഴിഞ്ഞ മാസം 15 ന് തന്നെ പരാതി കൈമാറിയെന്നാണ് അന്വേഷണ സംഘം പറയുന്നത്. അതേസമയം കേസിൽ അടുത്ത മാസം ഒൻപതിന് വിധി പറയും. ആസാദ് കശ്മീർ പരാമർശത്തിൽ കെ.ടി ജലീലിനെതിരെ രാജ്യദ്രോഹത്തിന് കേസ് എടുക്കണമെന്നാണ് മണിയുടെ ആവശ്യം.
ഓഗസ്റ്റിലായിരുന്നു ജലീലിന്റെ വിവാദ പരാമർശം. ഓഗസ്റ്റിൽ അദ്ദേഹം കശ്മീർ സന്ദർശിച്ചിരുന്നു. ഇതുമായി ബന്ധപ്പെട്ട് എഴുതിയ ഫേസ്ബുക്ക് പോസ്റ്റിലായിരുന്നു വിവാദ പരാമർശം. ഇന്ത്യയിൽ നിന്നും വേർപെട്ട ഭാഗം പിന്നീട് ആസാദ് കശ്മീർ എന്നറിയപ്പെട്ടുവെന്നായിരുന്നു ജലീൽ പറഞ്ഞത്. ഇതിന് പുറമേ ഇന്ത്യവിരുദ്ധ പരാമർശങ്ങളും പോസ്റ്റിൽ ഉണ്ടായിരുന്നു.
Comments